Rojbûna Rêberê Gelê Kurd Abdullah Ocalan ku weke rojbûna gelê Kurd tê pêşwazîkirin, li bajarê Cenevre yê Swîsreyê bi çalakiyekê hat pîrozkirin. Pîrozbahî bi pêşengiya Tevgera Jinên Kurd a Swîsreyê (YJK-S) li ber Nûnertiya Neteweyên Yekbûyî (NY) hate lidarxistin. Di pîrozbahiyê de al û wêneyên Rêberê Gelê Kurd Abdullah Ocalan hatin hildan.

Kurdistaniyan bi coşeke mezin 74’emîn rojbûna Rêberê Gelê Kurd Abdullah Ocalan pîroz kirin û peyama ku sala 2022’an wê bibe sala azadiya Rêberê Gelê Kurd Abdullah Ocalan dan. Pîrozbahî bi rêzgirtina ji bo şehîdan dest pê kir.

Di pîrozbahiyê de endama Tevgera Jinên Kurd a Ewropayê (TJK-E) Zozan Serhed axivî. Serhed anî ziman ku rojbûna Rêberê Gelê Kurd Abdullah Ocalan ji bo gelê Kurd û jina Kurd di warê dest pê kirina têkoşînê de watedar e. Serhed diyar kir ku azadiya Rêberê Gelê Kurd Abdullah Ocalan tê wateya azadiya jinên Kurd û azadiya gelê Kurd û wiha got:“ Em ê bi xwedî derketina azadiya Rêberê xwe azadiya xwe mîsoger bikin. Weke jinên Kurd pêşengiya me ew e ku tecrîda li ser Rêberê xwe bişkînin û di sala 2022'an de bi pêngava 'Dema Azadiyê' bi serketinê tacîdar bikin û wê bibe sala azadiya Rêbertiya me.“

Piştî axaftinan bi boneya rojê şitil hatin danîn.

Piştre belavokên bi zimanê Fransî hatin belavkirin û li ber muzîkê govend hate gerandin.

Bi boneya 4’ê Nîsanê rojbûna Rêberê Gelê Kurd Abdullah Ocalan wê di 3 û 4’ê Nîsanê de li gelek navendên Swîsreyê şahiyên pîrozkirinê bên lidarxistin.