Li bajarê Hamburg ê Elmanyayê pankarteke mezin a piştgiriya Yekîneyên Parastina Jinan (YPJ) dike ji aliyê polîsan ve hate sansurkirin. Pankarta ku di çarçoveya kampanyaya "Em hemû YPJ ne" de li ser dîwarê navenda Rote Flora ya semta Sternschanze hatibû daliqandin, ji aliyê polîsan ve hat boyaxkirin û nixumandin.

Kampanyaya "Em hemû YPJ ne" daxwaz dike ku tevlibûna YPJ’ê ya di nav avahiyên Wezareta Parastinê ya Sûriyeyê de were misogerkirin. Hefteya derbasbûyî di çarçoveya kampanyayê de li gelek welatan mitîng, panel, çalakiyên hunerî û kampanyayên agahdariyê hatin lidarxistin. Çalakvanan di çalakiyan de bal kişandin ser rola YPJ’ê di parastina destkeftiyên demokratîk rizgariya jinan a li Bakur û Rojhilatê Sûriyeyê.

Înîsiyatîfa "Hamburg fur Kurdistan" ku piştgirî da kampanyayê, diyar kir ku armanca pankarta mezin a li ser dîwarê Rote Flora daliqandî ew bû ku balê bikişîne ser gefên li ser destkeftiyên demokratîk û femînîst ên li Rojava û girîngiya YPJ’ê di parastina van destkeftiyan de hat destnîşankirin.

‘MAFDARIYA VÊ SANSURÊ TINEYE’

Endamên Meclisa Jinan a Rojbîn a Hamburgê piştî ku di saetên serê sibe ya roja Çarşemê de dîtin ku pankart hatiye boyaxkirin, bertek nîşanî rewşê dan. Di daxuyaniya li ser navê meclisê hat dayîn de wiha hat gotin: "Em vê helwesta polîsên Hamburgê şermezar dikin. Em hemû YPJ ne. Bi ti awayî mafdariya vê sansurê tineye.”

Berdevka ku ji ANF’ê re axivî, destwerdana polîsan şiband helwesta komên Îslamî yên Sûriyeyê ya li hember YPJ’ê û got: "Em ji bo têkoşîna wan a li dijî DAIŞê her tim spasdarê YPJ’ê ne."

YPJ LI ELMANYAYÊ NE QEDEXE YE

YPJ û Yekîneyên Parastina Gel (YPG) li Elmanyayê ne di nava rêxistinên qedexekirî de ne. Lê polîsên Hamburgê berovajî gelek eyaletên din bi awayekî sîstematîk destwerdanê bi bikaranîna sembol û dîmenên hêzên parastina Rojava yên li qadên giştî dikin.

Dozgerî heta niha lêpirsînên ji ber van destwerdanên polîsan hatine vekirin betal kirine. Talîmata Serdozgeriya Hamburgê ku parêzer jî li ser wê lêkolîn nekirine, bingeha van pratîkên polîsan pêk tîne. Ji ber vê yekê, kesên ku rastî van destwerdanan hatine li dadgeha îdarî ya herêmî doz vekirin.