KOMAW'ê ji saziyên navneteweyî xwest ku li hemberî êrişên hevpar ên dewleta Tirk û PDK'ê bêdeng nemînin û destnîşan kir, ku divê li gel têkoşîna mafdar a gelê Kurd cih bigirin.

Komeleya Malbatên Şehîdan û Windahiyan (KOMAW) li ser êrişên dagirkeriyê yên dewleta Tirk û hevkariya PDK'ê ya bi dewleta Tirk re daxuyaniyek da.

Di daxuyaniyê de hate ragihandin ku dewleta Tirk a mêtinger ku AKP-MHP serkêşiyê jê re dike, bi hevkariya PDK'ê û piştgiriya navdewletî li pey êrişên nû û piralî yên ji bo tunekirina destketiyên li Başûrê Kurdistanê ye.

KOMAW'ê diyar kir ku li gel teknîk û her cûre êrişan jî dewleta Tirk a dagirker nikare bigihêje armanca xwe, ji Gerîlayên Azadiyê yên Kurdistanê derbên mezin dixwe, lewma jî têkilî û hevkariya xwe ya bi PDK'ê re xurtir dike.

Di daxuyaniyê de hate gotin, "Bêguman a ku me herî zêde aciz dike, PDK ye ku xwe Kurdistanî pênase dike. Weke ku tê zanîn ji bo PDK dawî li hevkariya xwe ya bi dijminê Kurdan dewleta Tirk a faşîst mêtinger re bîne beriya niha me gelek daxuyanî dabûn û bang kiribûn.

Her wiha gelek saziyên din ên Kurdistanî jî heman bang kirin, lê belê diyar e ku PDK guh nade bangên me û berevajî vê yekê bi dewleta Tirk re têkiliyê xurtir dike.

Tevî vê yekê bi navê saziya malbatên şehîd û windayan KOMAW, em careke din bang li PDK'ê dikin û dibêjin, eger tevî vê yekê jî hevkariya xwe ya bi dewleta Tirk a faşîst re dewam bike wê ji aliyê gelê Kurd û dostên wan ve weke xayin bê pênasekirin û li gorî vê yekê wê helwest bê nîşandan.

Di daxuyaniyê de li dijî êrişên dewleta Tirk a kujer û qirker û hevkariya PDK'ê ya pê re, bang li sazî û welatparêzên Kurdistanî hate kirin ku helwesteke hîn bi bandor nîşan bidin û yekîtiya Kurdistanî a berfireh ava bikin.