Hevserokê KCDK-E Engin Sever, têkildarî Meşa navendî ya ku wê di 8'ê Mijdarê de li Koln Deutzer Werfê bi şîara "Dawî li Sîstema Tecrîda 27 Salî Bîne! Meşa Ji Ocalan re Azadî" were lidarxistin, ji ajansa me re axivî.

BIRYARA AŞTÎ Û CIVAKA DEMOKRATÎK

Sever destnîşan kir ku gelê Kurd di pêvajoyeke dîrokî re derbas dibe ku ew encama berxwedana mezin a ciwanan, jinan û têkoşîna 27 salî ya Rêber Apo ye. Sever bîr xist ku ev berxwedan rê li ber banga Rêber Apo a 27'ê Sibatê ya "Aşitî û Civaka Demokratîk" vekiriye. Tevgera Azadiya Kurd jî, li ser vê bingehê, bi biryara Kongreya xwe ya 12'emîn, biryara sekinandina têkoşîna çekdarî ya li Tirkiyeyê girt û di 11'ê Tîrmehê de jî bi şewitandina çekan îradeya xwe ya aştiyê nîşan da.

Sever got, Kurd li dijî polîtîkayên qirkirinê yên modernîteya kapîtalîst, têkoşîna avakirina jiyaneke hevpar a demokratîk dimeşînin. Sever destnîşan kir ku bi Meşa 8'ê Mijdarê, wê peyameke zelal ji cîhanê re bê dayîn: "Em ne şer, lê aşitî dixwazin; em ne dabeşbûn, lê jiyaneke hevpar ava dikin."

AZADIYA OCALAN PÊNGAVA SÊYEMÎN E

Sever diyar kir ku ev meş di heman demê de qonaxa sêyemîn a Pêngava Navneteweyî ya "Ji Ocalan re Azadî, Ji Pirsgirêka Kurd re Çareserî" jî îlan dike. Sever bi tundî anî ziman ku heta azadiya fîzîkî ya Rêber Apo pêk neyê, çareserkirina Pirsgirêka Kurd ne pêkan e.

Sever rexne li helwesta dewleta Tirk kir û destnîşan kir ku tevî hemû gavên Tevgera Kurd, Komisyona Meclîsê ya Tirkiyeyê heta niha gaveke pratîk neavêtiye. Sever tekez kir ku mûzakerekarê sereke Rêber Apo ye û pêwîst e sîstema êşkenceyê ya Îmraliyê tavilê bidawî bibe û şertên ku Ocalan bi azadî bijî û bixebite, bêne avakirin.

ARMANCA MEŞÊ JI BO ÇÊKIRINA ZEXTÊ LI SER EWROPAYÊ YE

Sever bal kişand ser rola Ewropayê û got, welatên Ewropayê di Komploya Navneteweyî de cih girtin û tevî biryarên DADÊ jî, polîtîkayên nebaş li ser Kurdan dimeşînin. Wî got, Kurdên Dîasporayê bi hêza xwe ya rêxistinkirî dikarin zextê çêbikin.

Sever, Meşa 8'ê Mijdarê wekî "xaleke werçerxê" nirxand û destnîşan kir ku azadiya Ocalan, tê wateya statûya Rojava, Şengalê û vekirina rêya siyaseteke demokratîk li Tirkiyeyê.

BANGA SEFERBERIYÊ JI BO HER KESÎ

Sever diyar kir ku KCDK-E û TJK-E ji destpêka Cotmehê ve bi ruhê seferberiyê di nava xebatan de ne. Sever got, ji 1'ê Mijdarê pê ve li gelek welatên Ewropayê û cîhanê çalakiyên girseyî dest pê kirine û amadekarî ji bo veguhestina bi sedan otobusan ji welatên Ewropayê (Fransa, Belçîka, Holanda, Swîsre û Almanya) hatine kirin.

BANGA TEVLÎBÛNA GIRSEYÎ

Armanca me ew e ku em tevahiya Ewropayê bihejînin. Divê her kes bi ruhê seferberiyê berê xwe bide Kolnê. Jin, ciwan, kal û pîr, her kes divê deriyê mala xwe bigire û biherike Kolnê. Em bang li hemû hêzên demokrat ên Tirkiyeyê û partiyên Kurdistanê dikin ku beşdarî vê meşa dîrokî bibin da ku bi hev re azadiya hevpar ava bikin.