Li paytexta Norwêc Osloyê roja Şemiyê bi boneya 3’yemîn salvegera şoreşa “Jin Jiyan Azadî”, çalakî hate lidarxistin. Çalakî seat di 16:00’an de li ber Wezareta Karên Derve ya Norwêcê pêk hat.

Çalakî ji aliyê nûneriyên partî û rêxistinên siyasî yên Rojhilatê Kurdistanê yên li Norwêcê ve bi hevkarî hate organîzekirin. Di nav beşdaran de Partiya Jiyana Azad a Kurdistanê (PJAK), Komîteya Şoreşa Karkerên Kurdistana Îranê, Rêxistina Têkoşîna Kurdistana Îranê – Norwêc, Partiya Azadiya Kurdistanê, Rêxistina Demokratîk a Yarsanan, Komeleya Karkerên Kurdistanê, Nûnertiya Komala ya Derveyî Welat û Partiya Demokratîk a Kurdistana Îranê (HDKA) hebûn.

Partî û rêxistinên Rojhilatê Kurdistanê yên li Norwêcê, di çarçoveya çalakiyê de peyamek weşandin û girîngiya şoreşê destnîşan kirin. Di peyamê de hate gotin ku kuştina Jîna Emînî ji aliyê Komara Îslamî ya Îranê ve hêrsa gelê Kurd û civakên din ên Îranê geş kiriye û ev yek bûye sedema şoreşa Jin Jiyan Azadî.

Her wisa hate diyarkirin ku şoreşê li civaka Îranê guhertinên siyasî, çandî û civakî yên kûr afirandiye û tevî hemû zextan jî didome. Di peyamê de hate ragihandin ku ji ber êrîşên rejîmê zêdetirî 500 kesan jiyana xwe ji dest daye, bi sedan kes jî birîndar bûne û bi hezaran kes jî hatine girtin. Êrîşên mûşekî û balafirên bêmirov ên rejîmê yên li dijî partiyên Rojhilatê Kurdistanê û cezayên darvekirinê yên li Pexşan Ezîzî, Werîşe Muradî û Şerîfe Muhammedî hatin dayîn jî hatin şermezarkirin.

Di çalakiyê de peyamên Belûcan û endamên Eniya Çepê jî hatin parvekirin. Piştre sê pêşkêşkeran peyam bi sê zimanan bi Kurdî, Farisî û Norwêcî xwendin. 

Çalakî bi tevlîbûna bi sedan endamên partiyan, welatparêz û gel, bi berzkirina dirûşmên “Jin Jiyan Azadî”, “Berxwedan jiyan e” û “Serhildan jiyan e” bi dawî bû.