Pirtûka “Çîroka Dilê Min” a ku ji bo Endamê Komîteya Rêveber a PKK’ê û Konseya Fermandariyê ya HPG’ê Îbrahîm Çoban (Atakan Mahîr) ku di 11’ê Tebaxa 2018’an de li Dêrsimê şehîd bû, li bajarên Cenevre û Bernê yên Swîsreyê bi xwendevanan re hat nasandin.

Pirtûka 'Çîroka Dilê Min' ji aliyê hevalên Atakan Mahîr ên têkoşînê Şiyar Dêrsim û Nûjiyan Munzur ve hatiye nivîsandin.

Di pirtûka ku tê de têkoşîna Atakan Mahîr hatiye nivîsandin, helbest û çîrokên Atakan Mahîr jî cih digirin.

Xwişka Atakan Mahîr, siyasetmedar Hatîce Çoban jî tevlî çalakiya danasîna pirtûka "Çîroka Dilê Min" a ji aliyê Tevgera Jinên Kurd a Ewropayê (TJK-E) ve li Cenevre û Bernê hat lidarxistin, bû.

Piştî Kongreya Navenda Civaka Demokratîk a Kurd a Bernê ku îro pêk hat, pirtûk bi xwendevanan re hat nasandin û bi îmzaya Hatîce Çoban li ser navê Atakan Mahîr li xwendevanan hat belavkirin.

Duh li Cenevreyê çalakiya danasîna pirtûkê hat lidarxistin. Piştî axaftina Berdevka Termê ya TJK-E Rabîa Baldemîr a li ser danasîna pirtûkê, Hatîce Çoban jî behsa tevlîbûna Atakan Mahîr a têkoşînê û jiyana wî kir.

Pirtûka “Çîroka Dilê Min” wê bi çalakiyên danasînê ku Swîsre jî di nav de li gelek navendên Ewropayê bên lidarxistin, bidome.