Rêveberiya Kobanê di çarçoveya şopandina dosyaya entegrasyonê ya li gorî peymana 29ˊê Çileyê de pêşwazî li şandeyek hikumeta demkî ya Sûriyeyê kir. Di civînê de entegrasyona saziyên xizmetguzariyê, aştiya navxweyî û berdana dîlgirtiyan hat nîqaşkirin.
Şandeyek ji Parêzgeha Helebê, bi serokatiya Îbrahîm Mihemed El Belîx, Rêveberê Bazirganiya Navxweyî ya Helebê û berpirsê dosyaya entegrasyonê bi Rêveberiya Xweser re, digel hejmarek ji rêveberên saziyên xizmetguzarî wekî rêveberên saziyên dexlûdanan, zimhêr û bazirganiyê serdana bajarê Kobanê kir.
Şande ji aliyê hevserokê Meclisa Rêveber a bajarê Kobanê Ferhan Hec Îsa, mûdîrê Rêveberiya Navçeya Kobanê Mihemed Mistefa Mihemed û nûnerên ji saziyên eleqedarî beşên çandinî, dexlûdan, firne û aşxaneyên li Kobanê ve hat pêşwazîkirin.
Di civînê de li ser rêbazên hêsankirina entegrasyona van saziyan, bi taybetî amadekariyên ji bo mewsia 2026ˊan, mekanîzmeyên piştgiriya beşa çandiniyê û piştgiriya cotkaran hatin nîqaşkirin. Li kêleka wan jî mijarên girêdayî li ser aştiya navxweyî û jiyana hevbeş di navbera Sûriyeyiyan de, redkirina gotinên nefretê û pêwîstiya bilezkirina berdana hemû dîlgirtiyan hatin gotûbêjkirin.
