Meclisa bajarê Holê ya kantona Cizîrê bi daxwaza azadiya fîzîkî ya Rêber Apo meşek girseyî li dar xist. Şêx û rûspiyên eşîran, nûnerên partiyên siyasî û endamên saziyên sivîl jî di nav de, bi sedan şênî beşdarî meşê bûn.

Girse ku ji pêşiya avahiya Perwerdeyê heya qada Mezin a naverasta bajêr meşiyan, dirûşmên bi daxwaza azadiya fîzîkî ya Rêber Apo û piştevaniya bi QSD’ê re berz kirin.

Meş li qada Mezin rawestiya û veguherî mîtîngê. Li vir bi navê Kongra Star Nîroz El Hemed axivî. Nîroz di axaftina xwe de bal kişand ser Banga Aştî û Civaka Demokratîk a Rêber Apo û got, banga Rêber Apo banga rawestandina şer li Rojhilata Navîn e û banga demokrasî azadiya gelên herêmê herêmê ye.

Nîroz di dewama axaftina xwe de piştgiriya xwe bi QSD’ê re anî ziman û got, QSD’ê li hemberî hemû êriş û xetereyên li ser herêmê mertalên asê ne.

Ji fermandarên Hêzên Ewlekariya Hundirîn Ezîz Qamişlo jî di mîtîngê de axivî û destnîşan kir ku aştî bi dirûşman nayê avakirin, lê bi berdêl û têkoşînê ava dibe.

Ezîz Qamişlo jî îşaret bi berxwedana QSD, YPJ  û Hêzên Ewlekariya Hundirîn kir û diyar kir ku van hêzan ji bo parastina gelên Bakur û Rojhilatê Sûriyeyê berdêlên giran dan û hîna jî didin.

Ezîz Qamişlo anî ziman ku bêyî rêberên ku ji bo azadî û edaletê tê dikoşîn aştiyeke rasteqîn pêk nayê û ev peyam da, "Ji vir em dengê xwe bilind dikin û daxwaza azadiya fîzîkî ya Rêber Abdullah Ocalan dikin. Rêber Abdullah Ocalan sembola ramanên demokratîk û xwişk û biratiya gelan e. Azadiya gelan bi azadiya rêberên wan ve girêdayî ye."

Di dewama mîtîngê de ji rêveberên Meclisa Bajarê Holê Elaa El Xelef jî got, ji bo cîhaneke azad û aştiyane û bi rûmet ava bibe têkoşînek bêhempa pêwîst e û ev li gotinên xwe zêde kir "Îro derfetek e ku em girîngiya xurtkirina lihevhatin û rêzdariya li hemberî mafên tevahiya mirovan bînin bîra cîhanê."

Elaa El Xelef jî piştgiriya xwe bi QSD’ê re anî ziman û wekî sembola berxwedana li hemberî zilmê pênase kir. El Xelef bi domdarî got: "QSD’ê parêzvanên aştî û azadiyê li Rojhilata Navîn in. "

El Xelef anî ziman ku azadiya fîzîkî ya Rêber Apo mafekî rewa ye û wiha dawî li axaftina xwe anî "Bêyî rêzdariya li hemberî mafên mirovan ên derbirîn û azadiyê ne mumkin e edalet pêk were."

Mîtîng bi berzkirina dirûşmên bi banga azadiya fîzîkî ya Rêber Apo û piştgiriya QSD’ê bi dawî bû.