Komîteya Qanûnî ya Bilind a Siwêdayê ku ji aliyê serokatiya rohanî ya Durziyan ve hatiye avakirin, bi daxuyaniyekê ragihand ku wê ji bo birêvebirina kar û barên bajêr û gundewarê wê ofîsa rêveberî ya demkî ava kiriye. Her wiha fermandarekî nû ji hêzên ewlehiya hundirîn re erkdar kiriye.

Di daxuyaniyê de wiha hat nivisîn: “Siwêdayê di pêvajoyeke hesas û girîng re di encama sûc û binpêkirinên hêzên hikumeta veguhêz û komên çekdar ên girêdayî wê de der bas dibe. Lewma ji bo peydakirina pêdiviyên şêniyan û birêvebirina saziyan, pêwîstî bi tevgereke birêxistinkirî hebû.”

Di daxuyaniyê de hate diyarkirin ku birêvebirina kar û barên rêveberî, ewlehî û xizmetguzarî ya parêzgehê, parastina saziyên giştî û taybet, tunekirina gendeliyê û rakirina zulmê li ser welatiyan, ji erkên komîteyê ye.

Di daxuyaniyê de hate destnîşankirin wê komîteyên şaxî yên pisporê alîkariyên xêraxwaziyê, lêkolînkirina rastiyan û sûcan, kar û barên windahiyan, kar û barên şehîdan û birîndaran, şopandina xebatên nexweşxaneyan û xebatên tenduristiyê, perwerdeyê, aborî û jîngehê, bên avakirin.

Di daxuyaniyê de hat eşkerekirin ku Mahir Xalib El Endarî bû sekreterê giştî yê parêzgehê, kolonêl Şekîb Ecwed Nasir bû fermandarê hêzên ewlehiya hundirîn û kolonêl Enwer Adil Ridwan bû sekreterê wî.