Bi wesîleya 25’ê Mijdarê Roja Têkoşîna li dijî Şîdeta li Hemberî Jinê ya Navneteweyî ji xeta sînor bangek din jî hat. Parlamentera HDP’ê ya Amedê Nursel Aydogan û Hevşaredara Êlihê Gulîstan Akel ku li sînor nobetê digirin, diyar kirin ku îsal di 25’ê Mijdarê de li benda hemû jinan e ku bên sînor.

Ji bo bernameya 25’ê Mijdarê ya li sînor bang didomin. Bangek jî ji Parlamentera HDP’ê Nursel Aydogan û Hevşaredara Êlihê Gulîstan Akel hat. Aydogan der barê 25’ê Mijdarê de axivî û diyar kir ku şîdet, taciz û tecawiza li hemberî jinê gerdûnî ye û got: “Li Tirkiyeyê û hemû cîhanê gelek kes rastî tecawizê, taciz û şîdetê tên. Têkoşîna li dijî şîdet û tecawizê têkoşîna me ya esas e."

TÊKOŞÎNA LI DIJÎ ŞÎDETÊ BERDEWAME

Aydogan diyar kir ku DAIŞ êrîşî her bawerî û çandê dike û got: “Li dijî van êrîşan berxwedanek mezin heye. Bi pêşengiya YPJ’ê berxwedanek mezin tê dayîn û ji hemû jinan re pêşengiyê dike. Em di 25’ê Mijdarê de hemû şehîdan di şexsê Arîn Mîrxan û Kader Ortakaya de bibîr tînin.”

HEMÛ JIN BERÊ XWE BIDIN PIRSÛSÊ

Hevşaredara Êlihê Gulîstan Akel jî diyar kir ku wê di 25’ê mijdarê de berê xwe bidin Pirsûsê û got ku li dijî her cureyê şîdetê jinên her çar parçeyên Kurdistanê, hemû jinên Tirkiyeyê divê xwedî li vê têkoşînê derkevin û li dijî taciz û tecawizê têkoşîna xwe bilind bikin.