Şaxa Îzmîrê ya Komeleya Mafên Mirovan (ÎHD) ji bo li hember qedexeyên kolanan ên li Kurdistanê, valakirina jiyangehan û piştre jî qetlîamên despêkirî bertekên xwe nîşan bidin, ji bo vê jî karibin raya giştî ava bikin, daxuyaniya çapemeniyê da.

Endamên komê li pêşiya Banka Sumer a Konakê hatin cem hev, pankart vekirin. Hevserokê Rêxistina HDP’ê yê Bajarê Îzmîrê Cavît Ûgûr jî piştgirî da daxuyaniyê. Li ser navê komê Caner Canli daxuyanî xwend, wiha got: “Eger li aliyekî welat mirov tên kuştin, ji cihên xwe tên koçberkirin û tevahî mafên wan ên mirovî ji destên wan tê girtin, tu nikarî bibejî ku yên li aliyên din dijîn wek mirovan dijîn.”

Canli wiha berdewam kir: “Li gor daneyên TÎHV, ji 16’ê Tebaxê 2015’an heta 11’ê Kanûnê 2015’an li 7 bajaran, li gor hejmara nifûsa 2014’an; 17 navçeyên ku bi temamî 1,299,061 kes lê dijîn bi giştî 52 caran bêdem û bi temamî rojê qedexeyên kolanan hatine îlankirin û ji van a herî dirêj 14 rojan berdewam kiriye.

Em parêzvanên mafên mirovan, dibêjin ku desthilatiya AKP’ê berpirsê tevahî canan e. Banga me ew e ku komkirinên leşkerî yên li herêmê divê bê rakirin; çek bên bêdengkirin; diyalog destpê bike! Xwişktî, biratî bi şer re nayê, bi aştiyê tê.”