Heyeta Şopandina Grevên Birçîbûnê ya li Marmarayê ji bo balê bikşînin ser tecrîda li ser Rêberê Gelê Kurd Abdullah Ocalan û grevên birçîbûnê ya ku 229 roj in li girtîgehan didome, li pêşiya Girtîgeha Jinan a Bakirkoyê daxuyanî dan.

Di daxuyaniyê de pankarta ‘Em jiyanê diparêzin, dawî li tecrîdê bînin’ hate vekirin. Hevseroka HDP’a Stenbolê Elîf Bûlût, parlementera HDP’ê Zuleyha Gulum, rêveberên HDK’ê, nûnerên saziyên sivîl û xizmên girtiyan tevlî daxuyaniyê bûn.

Di daxuyaniyê de Umît Efe diyar kir ku rayedar ji bo rakirina tecrîdê û binpêkirinên mafên mirovan tu gavan neavêjin û got “Tecrîd êşkenceyek e û êşkence him di hiqûqa navneteweyî de û him jî di hiqûqa navxweyî de wekî sûcekî li dijî mirovayetiyê ye. Desthilatdarî li gorî makeqanûnê û peymanên navneteweyî tevnagere û li girtîgeha girava Îmraliyê li ser Abdullah Ocalan û girtiyên din tecrîd dike û nahêle ku ew bi malbat û parêzerên xwe re rûnên.

Bi şewbê re tecrîd li hemû girtîgehan zêde bûye. Mekanîzmayên hiqûqî yên li pêşiya girtiyan hatiye girtin û ji ber vê jî neçar mane dest bi grevên birçîbûnê bikin.

Em bang li desthilatdariyê dikin ku di grevên birçîbûnê de hê seqetî û mirin pêk nehatiye, divê tecrîd û binpêkirinên mafên mirovan ên li girtîgehan were bidawîkirin.

Parêzer Veysî Eskî jî diyar kir ku bi şewbê re tecrîd li hemû girtîgehan belav bûye û bang li rayedaran kirin ku bila vê pirsgirêkê çareser bikin.