Wekîla HDP'î Tulay Hatîmogûllari ku li Hatayê bi mexdûrên erdhejê re ye, bal kişand ser dezenformasyona giran a têkildarî qadên erdhejê.

Hatîmogûllari got, "Ez ji vê derê dixwazim ji gelê me re bibêjim: Dezenformasyoneke gelekî cidî heye, agahiyên şaş û derewîn têne belavkirin. Bêguman li hemberî bûyerên diziyê em tedbîrên xwe yên ewlekariyê werbigirin, lê belê yek ji sedema vê dezenformasyonê ew e ku xelkê li Antakya, Samandag û Defneyê bide koçberkirin."

Wekîla HDP'î got, "Em ê koç nekin, em ê xaka xwe neterikînin. Em têkoşîna xwe ya ji bo jiyanê dewam bikin û qadên xwe yên jiyanê ji nû ve ava bikin. Ji kerema xwe re, ne ji neçarî be, nexweşê xwe tune be bila kes koç neke. Em li warê xwe bimînin û bi hev re qadên xwe yên jiyanê ji nû ve ava bikin."