Serdozgeriya Komarê ya Amedê di çarçoveya îfadeyên şahidê eşkere Umît Akbiyik de lêpirsîn dabû destpêkirin û di 25’ê nîsanê di çarçoveya lêpirsînê de li 21 bajaran operasyonên binçavkirinê hatibûn destpêkirin. Rojnamevan Bêrîtan Canozer jî hatibû binçavkirin û danişîna doza wê ya ewil a bi îdiaya “Endamtiya rêxistinê” li 10’emîn Dadgeha Cezayên Giran a Amedê hate lidarxistin. Rojnamevan Canozer û parêzerê wê Muharrem Erbey di danişînê de amade bûn. Şahidê eşkere Umît Akbiyik jî bi Pergala Deng û Dîmen (SEGBÎS) tev li danişînê bû.

Nûnerên Komeleya Rojnamevanên Jin a Mezopotamyayê (MKG), Komeleya Rojnamevanan a Dîcle Firatê (DFG)  û Komeleya Medya û Xebatên Hiqûqî (MLSA) jî danişîn şopandin.

Rojnamevan Canozer li dijî îdianameyê parastina xwe kir û got ku şahidê eşkere Umît Akbiyik nas nake û li ser nûçeyan hîn bûye ku endamê Meclisa Ciwanan a Partiya Demokratîk a Gelan (HDP) e. Canozer, wiha domand: “Her wiha di îdianameyê de nûçeyên min çêkirine weke sûc hatine nîşandan. Çavkaniyên van nûçeyan eşkere ne. Rojnamevaneke naskirî me û karê xwe bi veşartî nakim. Di demên berê de jî ji ber nûçeyên xwe hatim darizandin û dosyayên min ên beraetê hene. Ez, nûçeyên têkildarî jin û zarokan çêdikim. Em bûn dengê jin û zarokên hatine qetilkirin, yên tundî lê hatiye kirin, rastî tacîz û destdirêjiyê hatin. Bêyî ku ferq û cudahiyê têxim navbera wan min mîkrofon dirêjî jinên siyasetmedarên jin kir. Rojnamevanî û çêkirina nûçeyan sûc nîne. Tawanbariyên li min tên kirin qebûl nakim.”

Piştre jî li şahidê eşkere Akbiyik hate guhdarîkirin. Akbiyik ev îdia kir: “Di sala 2018’an de me konserek organîze kir. Dema ji bo hevpeyvînê hatibû HDP’ê me hev nas kir. Di xebatên Meclisa Ciwanan de û di bûyerên xendekê yên li Sûrê de, li cihê endamên rêxistinê bû. Ji bo hevpyevînan bi me re dişêwirî.”

Dozger jî bi îdiaya “endamtiya rêxistinê” xwest ku ji 7 sal û 6 mehan heta 15 salan cezayê girtîgehê li rojnamevan Canozer were birîn.

Parêzerê Canozer, Muharrem Erbey jî ji bo parastina li dijî mutalaayê dem xwest.

Dadgehê daxwaza Erbey qebûl kir û danişîna dozê taloqî 8’ê kanûnê kir.