Şervana YPJ’ê Şehîd Esma Ehmed (Rîtac) li Şehîdgeha Minbicê hat veşartin. Şêniyên Minbicê cenazeya şehîd Esma Ehmed (Rîtac) ji Nexweşxaneya Firatê girt û bi karwanekî wesayîtan ber bi Şehîdgeha li başûrê bajar ve çûn.

Li Şehîdgehê şervanên Meclîsa Leşkerî ya Minbicê toreneke leşkerî li dar xist.

Piştî deqeyek rêzgirtinê, Endama Meclîsa Leşkerî ya Jinan a Minbic Roj Cerablûs axivî û got: “Kesên xwîna xwe fedayê welat dike, heta ku ruhê wê biçe jî dijmin ditirsînin. Ji ber ku peyamên eşkere didin dijmin.”

Endama Meclîsa Malbatên Şehîdan a Minbicê Kefa El-Elî got, “Şoreşa ku jinan negire nava xwe ne pêkan e ku bi ser bikeve.”

Hevseroka Meclîsa Qanûnsazî ya Minbicê Sîham Hemû jî axivî û diyar kir: “Îro em kulîlkek ji kulîlkên Hêzên Parastina Jin dispêrin karwanê şehîdan da ku bi xwîna xwe erdê bajarê Minbicê av bide.”

Endama Koma Jinên Zenûbiya ya Minbicê Fadiye Resûl axivî û destnîşan kir ku ew bi rêzdarî bejna xwe li hemberî şehîd Rîtac ditewînin.

Piştî axaftin bi dawî bûn, endamê Meclîsa Malbatên Şehîdan a Minbicê Mihemed El-Şêx nasnameya şehîd Esma Ehmed xwend û radestî malbatê kir. Cenazeya şehîd bi drûşme û tililiyên dayikan hate veşartin.