Civaka Îslamî ya Kurdistan (CÎK) bi daxuyaniyek çapemeniyê êrîşa dewleta Îsraîlê ya li ser Nexweşxaneya El-ehli Baptîst a li Gazzeyê şermezar kir.

Di daxuyaniyê de hat diyarkirin ku dewleta Îsraîlê êrîşê nexweşxaneyekê kir û bi sedan mirovên bê guneh ji jiyanê qut kir û got ku pirsgirêka Filîstînê daxwaza azadî û maf e.

‘DEWLETÊN ZILMKAR Û KUJER NIKARIN VÊ PIRSGIRÊKÊ ÇARESER BIKIN’

Di daxuyaniyê de ev tişt jî hat gotin:

“Ji bo çareserkirina vê pirsgirêkê, divê her kes demildest di çarçoveya heq û hiqûqê de nêzî pirsgirêkê bibe. Desthilatdarên zilmkar û kujer nikarin vê pirsgirêkê çareser bikin. Misilman, Yahûdî, Xristiyan, Êzidî, Durzî û mirovên endamên baweriyên din divê qebûl bikin ku ev pirsgirêk ne pirsgirêkên olî ne. Tirkiye, Îran, Iraq û Sûriye her roj bi sedan mirovan qetil dikin, lewma ew nikarin vê komkujiyê rawestînin. Em weke kesên bawermend divê qet guh nedin van dewletan û nebin amûrê polîtîkayên wan. Divê em ji bo avakirina şert û mercên jiyana bi aştiyane, bixebitin.”