Bloka Aştiyê ya Stenbolê destek da akademîsyenên ku li dijî qirkirina li Bakurê Kurdistanê belavoka bi nivîsa "Em ê nebin şirîkê vî gunehî" weşandin û bûn hedefa Serokkomarê Tirk Tayyîp Erdogan.

Di daxuyaniya Bloka Aştiyê ya li ser mijarê de hat gotin, "Li ser navê aştî, azadî û wekheviyê, weke ku wan got, em jî dibêjin ku em ê nebin şirîkê vî gunehî."

Di daxuyaniyê de hat ragihandin ku Serokkomar û YOK'ê, ne tenê akademîsyen, saziya zanîngehê ya ku kadroyên rewşenbîr ên civakê diafirînin hedef girtine û hat gotin, "Beriya niha jî desthilatdariya siyasî ya heyî, ji rewşenbîrên îtiraz dikirin û polîtîkayên hikûmetê rexne dikirin re gotibû 'qaşo rewşenbîr'. Lê belê rewşenbîr, di hemû serdemên krîtîk de bûne wijdanê civakê. Akademîsyenên ji bo Aştiyê, daxwaza aştiyê bilêv kirin û helwesteke bi rûmet nîşan dan. Ev akademîsyen bi tenê nînin."