Komploya Navneteweyî ya ku 9’ê Cotmeha 1998’an di şexsê mîmarê Şoreşa Kurdistanê Abdullah Ocalan de li dijî gelê Kurd hat destpêkirin, di 15’ê Sibata 1999’an de bi dawî bû. Rêberê Gelê Kurd piştî ku ji paytexta Sûriyeyê Şamê derket, çû paytexta Yewnanîstan Atînayê û ji wir jî derbasî Rûsyayê bû û di 12'ê Mijdara 1998'an de berê xwe da paytexta Îtalya Romayê.

Rêberê Gelê Kurd ku di 17'ê Çileya 1999'an de di encama zextên dewletên rojavayî bi taybet DYA'yê de neçar ma ji Romayê derkeve, piştî ku di navbera Moskova-Musk û Atîna de çû û hat, di 2'ê Sibata 1999'an de bi dizî birin paytexta Kenyayê Naîrobî.

Panoramaya ku li rawestgeha Naîrobiyê ya têkoşîna 129 rojan a Rêberê Gelê Kurd a li dijî hêzên komploger 15 roj in pêk hatiye ev e:

1’ê SIBAT’Ê: LI MINSKÊ PLANÊN QIRÊJ

Abdullah Ocalan di 31'ê Çileya 1999'an de bi balafira ku ji aliyê dewleta Yewnanîstanê ve hatibû dayîn ber bi Mînskê ya paytexta Belarûsê ve bi rê ket. Qaşo wê balafira duyemîn jî Rêberê Gelê Kurd ji Mînskê bibira bajarê Lahey a Hollandayê. Lê di 1'ê Sibatê de Radyoya Hollandayê ragihand ku Rêberê Gelê Kurd dixwaze were Hollandayê û lê ev daxwaz hatiye redkirin. Wê şevê ne tenê Hollandayê, hemû Ewropa qada hewayî ji Abdullah Ocalan re girtin.

Li Mînskê ku timî hewl didin Abdullah Ocalan ji balafirê dakeve, vê ferzkirinê qebûl nekir û ji balafirê daneket. Li ser vê yekê, balafira Yewnanîstanê heman şevê saet di 04:00’an de vegeriya Atînayê. Abdullah Ocalan ku gihişt Atînayê, di heman şevê de bi lez û bez birin girava Korfuyê ya ku baregehên leşkerî yên Emerîka û Brîtanya lê ne. Sibeha 1’ê Sibatê Wezîrê Karên Derve Teodoros Pangalos bi rêya telefonê ji Sefîrê Bilind ê DYA yê li Atînayê Nîcolas Burns re axivî û diyar kir ku Abdullah Ocalan li Yewnanîstanê ye. Li aliyê din Burns ji Pangalos re got, "Temam, hun wî ji Yewnanîstanê derxînin, mudaxeleyî yên din nekin."

2'Ê SIBATÊ: BALAFIRA GLADÎO JI KORFÛ RADIBE

Abdullah Ocalan li ser daxwaza Qesra Spî di saet 20.30’an de ji mala xwe ya li Girava Korfuyê ber bi balafira Efrîkayê ya ku hatibû diyar kirin, bi rê ket. Piştî çend saetan balafira Rêberê Gelê Kurd ku ji Atînayê birin girava Korfuyê ya ku baregehên leşkerî yên Emerîka û Brîtanya lê ne, dema ku li Korfuyê dadiket, bi awayekî gumanbar ket xwarê. Wekî din, tu qeyda fermî ya balafira ku hatibû wî li wir hildabû, ne hejmara dûvê wî, ne al, ne nîşanek ku nîşan bide ku ew balafir ê kur e, tune bû.

Balafira ku ji aliyê NATO Gladio an jî CIA ve hatiye amadekirin, di saetên serê sibê de ber bi Efrîkayê ve bi rê ket. Karmendê îstîxbarata Yewnanîstanê Savas Kalenderidis ku bi Abdullah Ocalan re bû, diyar kir ku ew ê pêşî biçin Komara Efrîkaya Başûr. Qaşo ji ber ku serlêdana wan a penaberiyê hatiye redkirin, piştî ku demekê li Kenyayê bimînin, wê şensê xwe careke din biceribînin.

Balafira ku Rêberê Gelê Kurd tê de bû 2’ê Sibatê li gorî dema herêmê; li balafirgeha Jomo Kenyatta ya li paytexta Kenya Nairobi saet di 13.33’an de daket. Ew li vir ji aliyê Sefîrê Yewnanîstanê li Kenyayê George Kostoulas ve hat pêşwazîkirin. Kostoulas ê ku cara ewil Abdullah Ocalan li balafirgehê dibîne, wiha gotibû: “"20 sal in ez berpirsyariya yekîneya di NATO'yê de me ku te lêkolîn dike. Ez li ezmanan li te digeriyam, min tu li erdê dît.” Rawestgeha Kenya yê Komploya Navneteweyî ya 13 rojan, ku Abdullah Ocalan jê re digot 'Naîrobî dojeh' bi van gotinên Kostoulas ku hêmana taybet a NATO'yê ye, dest pê kir.

3 'Ê SIBATÊ: HEVDÎTINÊN VEŞARTÎ YÊN LI PAYTEXTAN

Di saetên roja yekem a Rêberê Gelê Kurd li Kenyayê de, li navendên ku pêl bişkoka Komploya Navneteweyî ya 9'ê Cotmeha 1998'an kiribûn, hevdîtinên dijwar dest pê kirin. Serê sibê di navbera Sekretera Daîmî ya Wezareta Karên Derve ya Kenyayê Kathourima û sefîrê Yewnanîstanê George Kostoulas de civîneke veşartî hat lidarxistin. Di heman demê de heyeta bi serokatiya Şefê Îstîxbarata Îsraîlê David Ivry li Enqereyê bi rayedarên Wezareta Karên Derve ya Tirk, MÎT û Midûriyeta Operasyonên Serfermandariya Giştî ya dewleta Tirk re hevdîtinek pêk anî.

Hêzên ku komplo organîze kirin, ji bo ku piştre çi bikin bi dewleta Tirk re li ser nexşeyeke rê dixebitîn. Daxuyaniya çaverêkirî ji Sefîrê Emerîkayê yê Atînayê Nicholas Burns di saetên êvarê de hat. Sefîrê Emerîkayê li Selanîkê axivî û got, "Ez difikirim ku Yewnanîstanê di derbarê Ocalan de çi pêwîst be kiriye." Ev gotin weke îtîrafên herî balkêş ên li ser rola Yewnanîstanê ya di komployê de cih girtin.

4'Ê SIBATÊ: HEVDÎTINA CIA Û MÎT'Ê

4’ê Sibata 1999’ê wek roja herî krîtîk a rawestana Kenyayê ya Komploya Navneteweyî ket dîrokê. Sefîrê Yewnanîstanê Kostoulas çû Wezareta Karên Derve ya Kenyayê û bi Sekretera Daîmî Kathourima re hevdîtin kir. Kenyayî ji bo Abdullah Ocalan ji Sefîrê Yewnanîstanê re got, "Wî bidin me, piştre mudaxele nekin.” Êvara heman rojê endamekî CIA’yê li mala xwe bi Musteşarê MÎT’ê yê Tirkiyeyê Şenkal Atasagun re hevdîtin kir. Di wê hevdîtinê de, CIA bi fermana Serokê Emerîka Clinton, plana operasyona dîlkirina Rêberê Gelê Kurd pêşkêşî MÎTê kir.

MÎT ê vê planê bigirta û bida serokwezîrê wê demê yê Tirk Bulent Ecevît. Ecevît di rojên pêş de got, "Di 4 'ê Sibatê de me agahiyên ku em dikarin Ocalan ji Efrîkayê bigirin, stand. Ji ber vê yekê ev mekanîzma di nava liv û tevgerê de hate danîn. Ez fam nakim ka çima Emerîka Abdullah Ocalan daye me."

Di heman rojê de Ecevît, Serfermandarê Giştî Huseyîn Kivrikoglu û Musteşarê MÎT’ê Atasagun bi Serokkomarê Tirkiyê Demîrel re hevdîtin pêk anîn û plana ku ji bo operasyona revandina Kenyayê hatiye amadekirin erê kirin.

Di wê rojê de pêşketineke din pêk hat ku nepenîtiyeke mezin veşartibû. Girava Îmraliyê ya li Behra Marmarayê ku bi salane bi Rêberê Gelê Kurd re tê bibîranîn, di 4'ê Sibata 1999'an de hate valakirin û girtî sewqî girtîgehên din hatin kirin. Roja din ev geşedana li Îmraliyê di quncika nûçeyan a kurt de cih girt, lê di wan rojên ku wê Îmralî bibe navenda tiştên ku wê ji niha û pê ve biqewimin, bi nepeniyeke mezin ji raya giştî hat veşartin.

5 'Ê SIBATA 1999'AN: ALBRÎGHT DI DEWRÊ DE BÛ

Wezîra Karên Derve ya Emerîkayê Madeleine Albright li Senatoya Emerîkayê axivî û got, "Her welatê ku Ocalan dihewîne, divê ji bo darizandina Ocalan hevkariyê bike." Ev gotinên Albright ji hikûmetên Nairobi û Atînayê re wek fermanek zelal bûn. Yekemîn pêngava pratîkî ya plana revandinê ya ku bi CIA-MOSSAD re hatibû amadekirin, di 5'ê Sibata 1999'an de hat avêtin. Ji bo ekîba Tirk a ku wê bifire Kenyayê, ji karsaz Cavît Çaglar ê ku yek ji navên kûr ên dewleta Tirk e û bi salan di ekîba Demîrel û Çîller de ye, balafira taybet a tîpa Falcon 900B hate xwestin.

Di vê navberê de di heman rojê de rêveberiya Naîrobiyê bi fermana DYA’yê lêpirsîn da destpêkirin. Li ser vê yekê Sefîrê Yewnanîstanê Costoulas ku li mala xwe Rêberê Gelê Kurd pêşwazî kir, bi telefonê li Atînayê geriya û der barê bûyerên qewimî de agahiyên berfireh xwest. Li gorî agahiyên ku wê rojê di çapemeniya Yewnanîstanê de cih girtin, Şêwirmendê Wezareta Karên Derve Papaioanou ji sefîr Costoulas xwest ku "wek şivanan tevbigerin û bi awayekî neqeyîtkirî fîtik bide.”

Piştre di 5’ê Sibatê de, fermanek cûda ji Papaioanou hat. Papaioanou ji Sefîr xwest ku ji Rêberê Gelê Kurd re bêje "Divê demildest axa Yewnanîstanê biterikîne." Ji bo pirsa Abdullah Ocalan wê bi ku ve biçe Papaioanou ev bersiv da:  “Stranbêjê mezin [navê kod ê Wezîrê Karên Derve Pangalos] pir bi hêrs e. Me qencî li wan kir. Bila me poşman nekin ku me qencî kiriye. [Ji Ocalan re] Ji wî re bêje bila here safariyê. Dixwaze biçe kuderê bila biçe, tenê bila ji axa me derkeve.”

6 'Ê SIBATÊ: PLANA REVANDINÊ AMADE YE

Qonaxa duyemîn a amadekariyên revandina Abdullah Ocalan ku li Kenyayê asê mabû bi hevkariya CIA-Mossad dest pê kir. Ji bo vê jî rayedarên dewleta Tirk di 6’ê Sibata 1999’an de bi welatên di navenda komployê de trafîka dîplomatîk a tund pêk anîbû. Wezîrê Derve yê Tirkiyê yê wê demê Îsmaîl Cem, bi sefîrê Îtalya ya Enqerê Masimilliano Bandini û Alîkarê Cigirê Serokwezîr Husamettin Ozkan, bi Sefîrê Emarîkayê yê li Enqerê re hevdîtin pêk anî.

Sedema vê tevgerê li Enqereyê bêguman tengkirina xeleka li dora Abdullah Ocalan bû. Rêberê Gelê Kurd Abdullah Ocalan ku bi tena serê xwe di nava şert û mercên dijwar de li mêvanxaneya sefîrê Yewnanîstanê ya li Kenyayê li ber xwe da, di heman rojê de rêyek dît ku bi awayekî fermî serlêdana penaberiyê li Yewnanîstanê bike

7 'Ê SIBATÊ: KURD JI BO RÊBERÊ XWE LI SER PIYAN E

Agahiyên ku welatên Ewropayê bi taybetî Yewnanîstan deriyên xwe ji Abdullah Ocalan re girtine, di çapemeniya Kurd û cîhanê de cihek berfireh girt. Rêberê Gelê Kurd ku ji çapemeniya Yewnanîstanê re axivî, welatên Ewropayê yên ku wî qebûl nakin, rexne kir. Li ser vê yekê xwepêşandanên gelê Kurdistanê û dostên wan gurtir bûn. Li gel berxwedana greva birçîbûnê û xwepêşandanên ku bi rojan e li Atînayê dewam dikin, hema hema li hemû welatên Ewropayê û li gelek navendên cîhanê li ber sefaretxane û konsolosxaneyên Yewnanîstanê çalakiyên girseyî hatin lidarxistin. Li gelek paytextên cîhanê konsolosxaneyên Yewnanîstanê rastî çalakiyên bêîteatiya sivîl hatin û car caran bûyerên tundiyê rû dan.

8 'Ê SIBATÊ: D'ALEMA LI MOSKOWAYÊ

Serokwezîrê Îtalyayê Massioma D'Alema ku çû Paytexta Rûsya Moskowayê rewşa Rêberê Gelê Kurd xistibû rojeva xwe. Lê belê, digel ku sal derbas bûne jî, tiştê ku D'Alema hefteyek beriya 15’ê Sibatê li Moskowê peyivî, hîn jî ji raya giştî re nehatiye nîşandan. Di vê navberê de, di heman rojê de li hemberî pirsên bi israr ên rojnamevanan Wezîrê Karên Derve yê Yewnanîstanê Theodoras Pangalos got, “Em Ocalan naxwazin. Ew ne li Yewnanîstanê ye, em nizanin ew li ku ye."

9 'Ê SIBATÊ: JI DOSTAN ÎNSIYATÎFA DAWÎ

Komek ji parlamenterên Yewnanîstanê yên endamên Parlamentoya Ewropayê, pêşnûmeya biryarê ya der barê rewşa Rêberê Gelê Kurd de pêşkêşî "Rûniştina mijarên lezgîn" a lijneya giştî kirin. Parlamenteran daxwaz kirin ku Îtalya mafê penaberiyê bide Abdullah Ocalan. Li Atînayê 3 parlementerên ji desthilatdariya PASOKê û 3 parlementerên partiyên muxalif daxuyaniyeke hevpar dan çapemeniyê û ji sefîrê Naîrobî xwestin ku daxwaza penaberiya siyasî ya Rêberê Gelê Kurd bê bersivandin.

Di vê navberê de, ji bo protestokirina helwesta rêveberiya DYA û êrîşên nîjadperest-faşîst ên dewleta Tirk ên di komployê de ku li dijî têkoşîna azadiyê ya gelê Kurd gav bi gav di şexsê Abdullah Ocalan de dihat pêk anîn, Kurdan li du navendên girîng ên Ewropayê dest bi berxwedana greva birçîbûnê kirin. Kurdistaniyên ku li bajarên Bonn û Cenevreyê bi komên ji 50 kesî dest bi grevên birçîbûnê kirin, daxwaza ewlekariya Rêberê xwe kirin.

10 'Ê SIBATÊ: 'EW KESÊ NAYÊ XWESTIN'

Parêzera Abdullah Ocalan Britta Bohler bi Wezîrê Dadê yê Hollandayê Benk Kothals re hevdîtin kir û daxwaza penaberiya siyasî ragihand. Di serlêdanê de hate ragihandin ku Rêberê Gelê Kurd neçar ma welatê ku lê dima biterikîne, welatê ku bi demkî xwe lê girt jî gefa radestkirina wî ya ji bo Tirkiyeyê lê xwar, lewma hate xwestin ku destûr bê dayin ji bo karibe bê Hollandayê. Lê Wezîr Kothals bêyî ku serlêdana penaberiyê bixe meriyetê, red kir û got, "Ocalan li Hollandayê kesekî nayê xwestin e û ketina wî ya welêt qedexe ye."

Di heman rojê de li eniya Parlamentoya Ewropayê (PE) geşedaneke girîng pêk hat. Daxwaza nîqaşkirina pêşnûmeya biryarê ya bi pêşengiya Parlamenterê Yewnanîstanê Alexanderos Alavanos û piştgiriya parlamenterên komunîst ên Yewnanîstan û Îtalyayê di rûniştina "Pirsgirêkên lezgîn" de hat amadekirin, hat redkirin. Parlamenterên Koma Sosyalîst, Xiristiyanên Demokrat, Lîberal û Keskan ên li PE’yê bi tevahî li dijî fikra dayîna mafê penaberên siyasî ji bo Abdullah Ocalan derketin.

11 'Ê SIBATÊ: LI NAIROBIYÊ DORPÊÇ TENG DIBE

Zext û gefên li hemberî Abdullah Ocalan ku 9 roj in li avahiya Sefaretxaneya Bilind a Yewnanîstanê ya li naverasta paytexta Kenya Naîrobî tê ragirtin, ji 11 'ê Sibata 1999'an û vir ve gihaşt asteke bilind. Hikûmeta Kenyayê ku bi rêveberiya DAY’ê re tevdigere xwest, Abdullah Ocalan tavilê ji avahiya sefaretxaneyê bê derxistin û ji welêt derkeve. Ji Sefîrê Bilind ê Yewnanîstanê George Kostoulas ê bi vê armancê bang li Wezareta Karên Derve ya Kenyayê hat kirin, fermana "Ocalan tavilê bişînin Yewnanîstanê" da.

12 'Ê SIBATÊ: 'BILA TAVILÊ JI WIR DERKEVE'

Dema ku Rêberê Gelê Kurd Abdullah Ocalan tevî her cure şantaj û gefan ji sefaretxaneyê derneket, rêveberiya Atînayê doza zextê zêde kir. Musteşarê rêxistina îstîxbarata Yewnanîstanê ya EYP'ê Haralambos Stavrakakis bi telefonê li îstîxbaratê Kalenterîdîs ê ku bi Abdullah Ocalan re bû geriya û ev ferman da: “Ocalan ji qada sefaretxaneyê derxînin. Ji wî re bêje ku demildest ji avahiyê derkeve û here ku derê bixwaze. Me tu soz neda wî.” Lê tevî vê fermanê jî, ji ber ku teminata jiyanek ewle ji Abdullah Ocalan re nehat dayîn ji avahiya Sefaretxaneyê derneket.

13 'Ê SIBATÊ: 'BI ZORÊ DERXIN’

Musteşarê rêxistina îstîxbarata Yewnanîstanê ya EYP'ê Haralambos Stavrakakis bi telefonê li Kalenterîdîs ê ku wezîfedarê îstîxbaratê yê li gel Rêberê Gelê Kurd e kir û fermanek nû da. Li hemberî biryardariya Rêberê Gelê Kurd a ku ji avahiya Sefaretxaneya Yewnanîstanê derneket, Stavrakakis got, "Eger pêwîst bike bi zorê Ocalan derxin." Li gorî îdîayan dema ku Kalenteridis diyar kir ku ew nikare vî karî bike, kesekî din ji navenda EYP’ê telefon kir û got: “Savvas guh bide min! Ez Tzovaras im. Niha sê wezîr û Musteşarê EYP’ê li gel min hene. Kariyera van her sê wezîran ji ber tiştên ku we kirine, di xetereyê de ye, tu fêm dikî? Divê tu biçî û demildest bi zorê Ocalan derînî.”

Di vê navberê de Serokwezîrê Tirk Bulent Ecevît ê ku dema ji Navenda Giştî ya Serokwezîriyê derdiket bersiv da pirsên rojnamevanan ên derbarê agahiyên dibe ku Abdullah Ocalan li Efrîkayê be wiha got: “Nizanim. Em jî agahiyên cuda dibihîzin. Ew ê zû an dereng xuya bibe. Ger derkeve holê jî ew ê bê îmha kirin û dernekeve jî wê îmha bibe. Hinekî zêdetir sebir bikin. Helbet dengê wî dê ji cihekî vê dinyayê were.”

14’Ê SIBATÊ: JI ATÎNAYÊ EKÎBEK TAYBET LI NAÎROBÎ YE

Piştî ku Abdullah Ocalan ji avahiya Sefaretxaneya Yewnanîstanê derneket, 4 îstixbarata Yewnanîstanê ya payebilind EYP'ê vê carê ji Atînayê danê nîvro gihiştin Naîrobî ya paytexta Kenyayê. Şêwirmendê payebilind ê Wezîrê Karên Derve yê Yewnanîstanê Vassilis Papaioanou, di heman rojê de careke din telefonî sekreterê sefîr kir û di derbarê ev tîmê taybet dê çi bike de agahî da û fermanên nû da: "Tîma futbolê dê talîmatan tavilê û dema ku hewce bike dê bi zorê bicîh bîne. Ocalan wê demildest bê derxistin. Wî bibin ber otêlek nêzîk û careke din pê re pêwendî nedanin. Heya sibe divê ev hemû pêk bê.”

Rêberê Gelê Kurd Abdullah Ocalan daxuyaniyeke nivîskî weşand û hişyariyên cidî da. Bal kişand ser rola Rûsya, Yewnanîstan, Îtalya, Elmanya û Fransayê ya di komployê de û wiha got: “Daxwaza min a penaberiyê ya ku piştî hatina min a Romayê derket pêş çavan, destek erênî negirt. Heta ku ev daxwaz neyê qebûlkirin, ez hêvî dikim ku ewlehiya jiyana min li cihê ku ez niha lê me, misoger bibe.”

15’Ê SIBATÊ: 'JI SEMBOLÊN NETEWEYÎ DERXIN'

Zextên Yewnan û Kenyayan ên li ser Rêberê Gelê Kurd Abdullah Ocalan di 15'ê Sibata 1999'an de di saetên serê sibê de dest pê kir. Niha Wezîrê Karên Derve yê Yewnanîstanê Pangalos û Şefê Îstîxbarata Kenyayê Noan Arap Ta berpirsyar bûn. Pangalos di nava rojê de gelek caran bang li sefaretxaneyê kir û telîmata "Ocalan ji sembolên me yên neteweyî derxînin" da.

Sefîr Kostoulas ji Abdullah Ocalan re got, "Dema ku me dabû we îro qediya, divê hûn ji avahiya sefaretxaneyê derkevin." Ligel ku daxwaza Rêberê Gelê Kurd a ji bo rojekê zêdetir li sefaretxaneyê bimîne nehat qebûlkirin, danê êvarê 5 wesayîtên ku di nav wan de polîsên Kenyayê jî hene li baxçeyê mala Sefîrê Yewnanîstan Kostoulas rawestiyan. Di nav Kenyayên ku hatin de şefê îstîxbaratê Noan Arap Ta jî hebû. Di wan kêliyan de ku yek ji krîtîktirîn kêliyên têkoşîna azadiya gelê Kurd bû, Abdullah Ocalan bi tena serê xwe li ber xwe da û hewl da ku rêyekê bibîne. Abdullah Ocalan ji Kenyayî re got, "Heta ku garantiya hikûmetekê ji min re neyê dayîn, ez dernayêm." Lê belê şefê îstîxbaratê Noan Arap Ta yê ku doza serdegirtinê zêde kir bi gotinên, “Balafir amade ye, di zûtirîn demê de derkevin derve. Şev nêzîk dibe, ez nikarim garantî bikim ka dê bi şev çi bibe" gef xwar.

Li hemberî zext û gefên nava rojê, danê êvarê Rêberê Gelê Kurd neçar ma ji avahiya Sefaretxaneya Yewnanîstanê derkeve. Dema ku ji avahiya sefaretxaneyê derket, polîsên Kenyayê bi wesayîteke tîpa Toyota Land Curiser ew birin balafirgehê. Abdullah Ocalan ê danê êvarê saet di 20.00’an de ji bo azadiya gelan bi rê ket, bi komploya hêzên cîhanî gav bi gav radestî dewleta Tirk a ku bi salan li dijî wê têdikoşe, hate kirin.

Agahiyên ku dihat gotin Rêberê Gelê Kurd bi awayekî çav girtî, ling û destê wî girêdayî dîl hatiye girtin winda ye û aqûbeta wî ne diyar e, şeva 15-16’ê Sibatê li ser ekranên Med TV’ê hate ragihandin. Agir ji nişka ve dikeve dilê bi milyonan mirovî, Kurdên ku ji xwe bi rojan e li meydanên welatên bêhejmar û bi sedan bajarên cîhanê ne, wê bikevin roja nû; Yanî 16 'ê Sibatê ji bo serhildaneke nû ya ku cîhanê bihejîne hişyar bû. Balafira ku Rêberê Gelê Kurd tê de ye, sibeha 16’ê Sibatê saet 03:30’an gihîşt Stenbolê.