Tecrîda şidandî ya li ser Rêberê Gelê Kurd Abdullah Ocalan, li bajarê Elmanya Bîelefeldê bi meşekê hat şermezarkirin.

Meşa bi pêşengiya Ciwanên Azad, bi beşdariya zêdeyî 200 Kurdistanî û dostên wan, li navenda bajêr li Jahnplatzê destpê kir.

Kurdistaniyan di meşa xwe ya li rêgeheke dirêj de, bi qîrîna dirûşmeyan polîtîkayên hikûmeta AKP'ê şermezar kirin û xwestin Rêberê Gelê Kurd azad bibe.

Li dû meşê, li ber Haûptbahnhofê daxuyaniyek hat dayîn. Li ser navê Navenda Civaka Demokratîk a Kurd Vakkas Sabanci li vê derê axivî û diyar kir ku, AKP a nikare xwe li serketina HDP'ê ya hilbijartinê û destketiyên li Rojavayê Kurdistanê rabigire, tecrîda li ser Ocalan şidandiye.

Nûnerê Navendê Sabanci da xuyakirin ku bi vê tecrîdê re teslîmiyet li ser gelê Kurd tê ferzkirin û destnîşan kir, ku gelê Kurd wê ti carî vê qebûl neke.

Di dewama daxuyaniyê de her wiha bang li Serokkomarê Tirkiyeyê Tayyîp Erdogan û rayedarên dewletê hat kirin ku tavilê dest bi muzakereyan bikin û hat xwestin, ku ji bo rêveçûna muzakereyan jî Rêberê Gelê Kurd Abdullah Ocalan azad bibe.

Çalakiya ku berêvarê destpê kir, saet di 19:00 de bi qîrîna dirûşmeyan bi dawî bû.