Di merasîmê de Endamê Komîteya Şehîdan a PKK’ê Îbrahîm Mihemed Emîn, ji fermandarên YJA-Starê ya li Kerkûkê Berîtan Rûken, Hevseroka Tevgera Azadî ya li Hewlêrê Semîra Hemed Emîn û Endamê Tevgera Ciwanan Şiyar Hesen bang li her kesî kirin ku xwedî li têkoşîna Hamîd derkevin.

Endamê Komîteya Şehîdan a PKK’ê Îbrahîm Mihemed Emîn anî ziman ku “Xwîna gerîla, şervan û pêşmergeyan ên têkoşîna azadiyê dimeşînin ji bo heman armancan di nav hev de herîkiye” û bang li her kesî kir ku seknek li gor vê nîşan bidin.

Emîn bal kişand ku şerê îro tê meşandin, şerê hebûn û nebûnê ye, wiha dom kir; “Îro têkoşîna li Rojava êdî sînorên Kurdistanê derbas kiriye, gihiştiye wê merheleyê ku qedera Rojhilata Navîn bandor dike. Lewre jî hêzên li wir têdikoşin, bûne hêviya tevahî herêmê.”

Fermandara YJA-Starê ya li Kerkûkê Berîtan Rûken jî destnîşan kir ku bi saya Hamîd û hevalên wan ên têkoşêr ve Minbic hatiye rizgarkirin, got; “Hamîd, bêyî bikeve fikara ti berjewendiyan tevlî şoreşa Rojava bû.”

Hevseroka Tevgera Azadî ya li Hewlêrê Semîra Hemed Emîn û Endamê Tevgera Ciwanan Şiyar Hesen bal kişandin ku sîstema Rêberê Gelê Kurd Abdullah Ocalan îro ji bo tevahî mirovahiyê bûye hêviya rizgariyê, lewre jî gelek mirovên ji Kurdistanê, herêmê û cîhanê tevlî vê şoreşê dibin.

Bahaddîn Hamîd (Fîraz Kardox), 3’yê Tebaxê di şerê rizgarkirina Minbicê de gihişt şehadetê. Piştî 10’ê Tebaxê ji deriyê sînor ê Sêmalka derbasî Başûrê Kurdistanê hate kirin, hêzên asayîşa Dihokê yên girêdayî PDK’ê êrîşî girseya gel a xwedî li cenaze derketin kirin, cenaze ji wan wergirtin û piştre jî bi merasîmeke ku tenê malbat tevlîbûyî ve spartin axê.

Hamîd ku berê di nav PDK’ê de pêşmergeyekî payebilind bû, ji sala 2011’an û vir ve li Swêdê jiyana xwe didomand. Hamîd ê zewacî ye û bavê 2 zarokan e, beriya 4 mehan tevlî refên Şoreşa Rojava bibû.