Şaredariya Sûrê bi boneya meha Remezanê ya pîroz derdora hezar malbatên nirxdar dawetî xwarina fitarê kir. Xwarina fitarê li koşka Gazî bi tevlîbûna Hevşaredarên Sûrê Fatma Şik Barût û Seyîd Narîn, rêveberên partiya DBP û HDP, parlamenterê HDP Îmam Taşçier, parlementerê Wanê Adem Ozcan, hevserokên MEYA-DER'ê, meclîsên taxan û gelek endamên malbatên xwedî nirx, hat dayîn.

Beriya fitarê deqeyek bêdeng li ser ruhê cangoriyên ku ji bo azadiya Kurdistanê canê xwe feda kirin hate rawestandin û çend ayet ji qurana pîroz hatin xwendin. 

Di dawiya fitarê de jî Hevşaredar Fatma Şik Barût axivî û destnîşan kir ku hatina ba van malbatên xwedî nirxên giranbuha ji bo wê rûmeteke mezin e û spasiya hemû malbatên ku beşdarî vê fitarê bû kir. Şik di axaftina xwe de diyar kir ku ew hêvîdar e ev meha pîroz a Remezanê bibe wesîleya aştiyeke bi rûmet û azadî û xweşiyê ji gelê kurd û hemû gelên herêmê re bîne. 

Şik di dawiya axaftina xwe de anî ziman ku ew ê her dem hewl bidin ku layiqî rêya wan cangoriyên xwe bibin, wê bi hemû hêza xwe hewl bidin ku xwedî li nirxên wan ên giranbuha derkevin û layiqî wan nirxên giranbuha bin.