Dewleta Tirk, stranên Kurdî yên di dawetan de komên muzîkê distirên, ji ber peyvên 'heval, serok, kesk, sor, zer' bi hinceta 'siyasî' ne, 'qedexe' kir. Stranbêjan jî gotin, "Em ê bi stranên xwe, li dijî vê zîhniyeta faşîst li ber xwe bidin."

Polîsên Tirk nivîseke Walîtiya Tirk nîşanî 300 komên muzîkê yên li dawetên li Wanê derdikevin ser dikê dan û gotin, "Ji niha û pê ve di stranên we de divê propaganda siyasî neyê kirin. Eger gotinên 'heval, serok, kesk, sor, zer' di stranan de derbas bibin, wê ev yek weke propganda rexistina terorê û alîkariya ji bo rêxistinê bê dîtin. Em ê wê çaxê dest deynin ser amûrên we û we binçav bikin."

'KURDÎ JI NÛ VE TÊ QEDEXEKIRIN'

Komên li Pasaja Wanê ya Nû karê muzîkê dikin, li ser mijarê ji ANF'ê re axivîn û diyar kirin, bi van qedexeyan ve Tirkiye li dema beriya salên 1990'î vedigere.

Stranbêjan dan xuyakirin, ku yekane çavkaniya wan a debarê ji destê wan tê girtin û got, "Em li gorî daxwaza xwediyê dawetê û beşdaran distirên. Ew çi bixwaze, em neçar in wê bistirên. Ev qedexeya bi fermana Walîtî hat kirin, ji bo welatê me cihê şermê ye."

'EM Ê BI STRANÊN XWE LI DIJÎ ZÎHNIYETA FAŞÎST LI BER XWE BIDIN'

Muzîsyenan  diyar kirin, tevî hemû zext û zordariyê jî ew ê hunera xwe bidomînin, stranên gel dixwaze bistirên û gotin, "Em ê tevî gelê xwe bistirên. Em ê bi stranên xwe li dijî zîhniyeta ku Tirkiyeyê ji nû ve dixe nava rojên tarî, li ber xwe bidin."