Kurdistaniyên li bajarê Federasyona Rûsya Tambovê dijîn, bi munasebeta pîrozkirina 37. Salvegera PKK’ê şahiyek lidar xistin. Şahiya ku duh bi şev saet di 18:00 de li salona konserê ya mala neteweyan hat lidarxistin, ji bogiyana cangoriyên Kurdistanê bi yek deqeyê rêgirtinê destpê kir. 

Di şahiyê de hevserokê Kongreya Êzîdiyên Rûsyayê Cemal Şemoyan û endamên rêveberiya bajarê Tambovê jî amade bûn. Şemoyan li ser wate û girîngiya rojê axivî û got: "Gelê Kurd roja 27’ê Mijdarê bi coşek mezin pîroz dike. Ji ber ku di vê rojê de gelê me ji zordestî û zilma neyarê li ser axa Kurdistanê îradeya gelê Kurd înkar dikin serî rakirin. Ji bo vê jî ev roj ji bo hemû Kurdan bi wate û girîng e. Îro li hemû cihê ku Kurd lê dijîn, ev rojê bi coşek mezin tê pîrozkirin. PKK di nava gelê me bûye sembola azadî û serfiraziyê." 

Di berdewama axaftina xwe de Şemoyan bal kişand ser tecrîda li ser Rêberê Gelê Kurd Abdullah Ocalan û got: "Mîmar û damazrînerê Partiya Karkerên Kurdistan Birêz Abdullah Ocalan di bin tecrîdek mezin de ye. Pêwîste dewleta Tirk ji van polîtikayên xwe yê qirêj xwe rizgar bike û tecrîda li ser Ocalan rake. Wê demê wê aramî were welêt."

Piştî axaftinên hatin kirin konsera şahiyên bi stranên hunermend Mem Ararat, Seyda Perînçek, komên govêndên Kurd û Rus, koroya jinên Rus û bi beşdariya hunermenden herêmî ve berdewam kir. 

Konsera şahiya 27’ê Mijdarê li gel stranan gerandina govendê ve heya derengê şevê berdewam kir.