Asayîşa Kerkûkê bi daxuyaniyeke çapemeniyê re ragihand, ku di nava meha Çileyê de 47 jê endamên DAIŞ'ê bi giştî 59 kes hatine girtin.

Berdevkê Asayîşa Kerkûkê Amîd Simko daxuyanî da û anî ziman, ku di çarçoveya xala 4. a Destûra Bingehîn a Iraqê de li bajarê Kerkûkê li hemberî sûcdarên terorê operasyon hatine kirin û di encama van operasyonan de 47 sûcdarên terorê bi giştî 59 kes hatine girtin.

Simko got, "Çeteyên DAIŞ'ê ji bo li Kerkûkê çalakiyan bikin, dikevin nava gelê sivîl ê ji herêma şer direvin û bi vî rengî hewl didin xwe berdin nava bajêr. Lê belê di encama karekî hesas ê tîmên antî terorê de, ev endamên çete hatin keşifkirin û li hemberî nuqteyên lê ne operasyon hatin kirin."

Simko da zanîn, ku di nava meha Çileyê de 59 kes hatine girtin û ev agahî da:

"47 jê bersûcên terorê, 5 bazirganê narkotîkê, 1 qaçaxçî, 2 kesên ji girtîgehê reviyan, 1 diz, 2 kesên fitne û fesadî dixist nava civakê, 1 bersûcê cînayetê bi giştî 59 kes di çarçoveya qanûnan de hatin girtin û radestî dadgeriyê hatin kirin."