Çalakiyên şermezar û protestokirina 17. salvegera komploya navneteweyî ya li hember Rêberê Gelê Kurd Abdullah Ocalan didomin. Bi sedan Kurdên Êzidî li çiyayê Şengalê kom bûn, li pêşiya Meclîsa Gelê Şengalê komplo şermezar û lenet kirin.

Di çalakiya protestoyê de peyamên Meclîsa Avakirina Şengal û Meclîsa Jinên Şengal û TEVDEM hatin xwedin, hat diyarkirin ku dixwazin gelê Kurd bi komplo, qetlîaman û girtinê îmha bikin û wiha hat ziman: “Em carek din jî bang li hemû cihanê dikin ku komploya li hember Rêber Apo hat pêkanîn tê wateya li hember tevahî gelên bindest û azadîxwaz e. Azadiya Rêber Apo, nîşaneyek ji bo jiyanek wekhev, xwişktî û biratiyê ye.”

Di daxuyaniyê de hêzên ku cih di komploya 15’ê Sibatê de girtin û yên ku dixwazin tevgera azadiyê bifetisînin hatin şermezarkirin û wiha hat gotin: “ Divê her kes baş bizanibe ku gelê me ji doza xwe ya mafdar venagere. Li ser bingeha felsefeya Rêber Apo em ê bijîn û têkoşîna xwe bigihînin serkeftin û azadiyê.”