Welatiyên Êzîdî yên hatin Amedê di yekemîn salvegera Komkujiya Şengalê de bi dirûşmên "Ji qirkirinê re êdî bes e" meşiyan. Li ser navê Êzîdiyan Maha Haluga daxuyanî xwend û xwest ku cîhan qirkirinê qebûl bike. Hevseroka KCD'ê Selma Irmak jî wiha got: "Şengal wê statuyê qezenc bike. Em Kurd her tim li cem gelê Şengalê ne."

Welatiyên Şengalê yên ji ber êrîşên çeteyên DAIŞ'ê ji Şengalê hatin Amedê û li Wargeha Fîdanlikê ya Şaredariya Yenîşehîrê bi cih bûn bi dirûşmeya "Ji qirkirinê re êdî bes e" meşiyan û komkujî şermezar kirin. Welatiyên Êzîdî kincên spî li xwe kirin û dowîz û pankartên Kurdî û Îngîlîzî yên komkujî vedigotin vekirin. Piştî daxuyaniyê Maha Haluga daxuyanî xwend û diyar kir ku nêzî 5 hezar jinên Êzîdî ji aliyê çeteyên DAIŞ'ê ve dîl hatin girtin. Haluga xwest ku welatên cîhanê qirkirinê bi awayekî fermî nas bikin. Haluga herî dawî  şervanên HPG, YPG û YPJ'ê re spas kir.

'ŞENGAL WÊ STATUYA XWE QEZENC BIKE'

Hevseroka KCD'ê Selma Irmak jî diyar kir ku Şengal ji dijmin re nabe mesken û divê hemû kes xwedî li Rojava derkeve. Irmak wiha bang li gelên cîhanê kir: "Şengal wê statuya xwe qezenc bike. Em ê hemû Kurd li cem gelê Êzîdî bin."

Irmak anî ziman ku polîtîkayên qirêj ên AKP'ê careke din ber bi şer ve çûn û piştî komkujiya Pirsûsê û komkujiyên de ev yek derket holê û wiha axivî: "Hûn nikarin çavên gelê Kurd natirsînin. Êdî bes e."

Piştî daxuyaniyê şanoya qirkirin vedigot hat pêşandan.