Piştî rakirina qedexeya derketina derve ya li Dêrika Çiyayê Mazî, bi sedan kesên li pêşiya navçeyê disekinînin, ber bi navenda navçeyê ve dest bi meşê kirin.

Parlamenterên HDP'yî û Hevserokê Giştî yê DBP'ê Kamûran Yuksek, piştî ku li ser qedexeyê bi Walîtiya Mêrdînê re hevdîtin kiri, hatin Taxa Bahçelîevler a li pêşiya navçeyê.

Hevserokê Giştî yê DBP'ê Kamûren Yuksek li vê derê daxuyaniyek da û anî ziman ku li navçeyê qedexeyeke bêwate hatiye ragihandin û got, "AKP nikare vî şerî qezenc bike. Bêyî ku hîn bêhtir mirov jiyana xwe ji dest bidin, divê hikûmet van polîtîkayên xwe biterikîne. Li Sûrê û navçeyên din, ev rewş dewam dike. Beşeke civakê ya ku her roj şîdet û zilmê dibîne, dibe ku nexwaze bi yên zextê li wan dike re bijî."

Piştî daxuyaniyê, bend û wesayîtên zirxî yên li pêşiya navçeyê hatin rakirin û vekişandin û welatiyan dest bi meşê kirin.

Li navenda navçeyê jî bi hezaran kes ji malên xwe derketin û tevlî meşê bûn.