Cenazeyê ciwanê bi navê Sîdar Saka yê ku di 1'ê Cotmehê de li taxa Yeşîlyûrt a Şirnexê ji aliyê polîsan ve hat înfazkirin piştî karên otopsiyê yên li Nexweşxaneya Dewletê ya Şirnexê anîn navçeya Mûş Milazgirê. Konvoya cenaze li herêma Kaniya Çivîka bi girseyî hat pêşwazîkirin û piştre cenaze anîn Milazgirê. Konvoya cenaze dûre hat gundê Tendurekê. Li pêşiya gund, cenazeyê Saka ji aliyê girseyê ve hat wergirtin û li ber qîrîna dirûşmeyên "Be serok jiyan nabe", "Tolhildan" û "Şehîd namirin" anîn mizgefta gund. Piştî wecîbeyên olî li hewşa mizgeftê merasîma cenaze hat lidarxistin.

Piştî rêzgirtinê Hevşaredara Milazgirê Memnûne Soylemez axivî û wiha got: "Serê hemû gelê Kurdistanê sax be. Wî ciwantiya xwe ji bo azadiya gelê kurd feda kir. Em jî soz didin hevrê Sîdar em ê têkoşîna te bidomînin."

Bavê Saka Siyament Saka jî spasî li hemû kesên tevlî merasîma cenaze bûn kir û wiha got: "Li hemberî vî şerî berxwedaneke bêhempa heye. Eger em bixwazin ev şer bi dawî bibe divê em hîn baştir xwe nas bikin."

Piştî axaftinan cenazeyê Saka li goristana gund hat definkirin.