Piştî êrîşa bombeyî ya li hemberî leşkeriyê li Enqereyê, dewleta Tirk sûcdariyên xwe yên li Rojava dike, didomîne. Berdevkê YPG'ê Rêdûr Xelîl bersiv da sûcdariyên li wan tên kirin û destnîşan kir, ku Tirkiye ji bo dagirkirina Rojava, ji ber xwe ve bahaneyan diafirîne.

Berdevkê YPG'ê Rêdûr Xelîl ev îdîayên dewleta Tirk ji ANF'ê re nirxand û got, "Dewleta Tirk, ya ku nikarîbû bi destê çeteyan bike, dixwaze bi xwe derbasî Rojava bibe û bike. Me beriya niha jî dabûn xuyakirin, ku ti êrîşek me li hemberî dewleta Tirk nîne. Tevî vê yekê jî her carê me dijmin nîşan didin û êrîşî xaka me dikin. Li pişt vê yekê niyeteke xerab û dijminatiya li gelê Kurd heye."

DEWLETA TIRK A KU BI DESTÊ ÇETEYAN NIKARÎBÛ BIKE, NIHA BI XWE DIXWAZE BIKE

Xelîl da xuyakirin, ku şexsê têkildarî êrîşa li Enqereyê navê wî tê bilêvkirin, ti eleqeya xwe bi YPG'ê û bi Rojava re nîne û got, "Heman piştî êrîşê, yekser bûyer xistin stûyê me. Bi vî rengî hewl didin ji xwe re bahaneyekê biafirînin û bikevin Rojava." Xelîl diyar kir, çeteyên pişta xwe dispêrin dewleta Tirk li tinebûnê ne û got, "Dewleta Tirk a ku bi destê çeteyan nikarîbû bike, niha dixwaze derbasî Rojava bibe û bi xwe bike."

DYA, ÎDÎAYÊN ENQEREYÊ HÊJAYÎ NIRXANDINÊ NEDÎT

Xelîl da zanîn, ku Dewletên Yekbûyî yên Amerîka (DYA), îdîayên Enqereyê hêjayî nirxandinê nedîtiye û destnîşan kir, ku êrîş û topbarana dewam dike, provokasyon e.