Li navçeya navendî ya Mêrdînê, bi armanca şermezarkirina komploya navneteweyî û komkujiya li Cizîrê hat kirin, daxuyaniyek hat dayîn. Hevserokê HDP'ê yê Navçeyê Nezîr Akaalp li ber avahiya DBP'ê ya navçeya navendî daxuyanî da û anî ziman, ku bi komploya navneteweyî re hatiye xwestin gelê Kurd teslîm bê kirin.

Akaalp da xuyakirin, ku êrîşên faşîzma AKP'ê yên îro li hemberî gelê Kurd, welatparêz, şoreşger û demokratan tên kirin û komploya berî 17 salan li hemberî Rêberê Gelê Kurd Abdullah Ocalan hat kirin xwedî heman armancê ye û got, "Çawa ku gelê Kurd li hemberî komployê li ber xwe dan, îro jî wê xurtkirina berxwedana demokratîk a li dijî faşîzma AKP'ê, bi ser bikeve." Daxuyanî piştî çalakiya rûniştinê ya 5 deqeyan bi dawî bû.

Li Silopiyayê jî, rêxistina HDP'ê ya navçeyê daxuyaniyek da çapemeniyê û bang kir, ku di salvegera komploya navneteweyî de jiyan li navçeyê were sekinandin. Hevserokê HDP'ê yê navçeyê Mahmût Yildizgorer bal kişand ser hovîtiya AKP li gelemperiya Kurdstanê dike û destnîşan kir, ku ew ê van polîtîkayên AKP'ê pûç bikin. Yildizgorer banga lidarxistina çalakiyan kir.