Li bajarê Winterthur ê Swîsreyê, ji bo 40'emîn roja wefata siyasetmedar Ahmet Yaman, bernameyeke bîranînê hat lidarxistin. Bernameya ku li Navenda Civaka Demokratîk a Kurd (NCDK) ya Winterthurê hat lidarxistin, tevî malbata Yaman; endamên NCDK a Winterthurê, dost û hevalên wî, Hevserokê CDK-S'ê Cemal Ozdemir û nûnerên Yekîtiya Jinên Kurd li Swîsreyê (YJK-S) beşdar bûn.

Di çalakiyê de sînevîzyoneke ku behsa jiyan, têkoşîn û xebatên Yaman dikir hat nîşandan. Di sînevîzyonê de bi taybetî cih hat dayîn xebatên wî yên rêxistinî yên di nav Tevgera Azadiya Kurdistanê de, xebatên civakî yên li diyasporayê, çalakiyên piştgiriya çandî û rola wî ya di têkoşîna mafên demokratîk de.

Hat destnîşankirin ku Ahmet Yaman bi salan li Ewropayê ji bo saziyên civaka Kurd, xurtkirina torên piştgiriyê û birêxistinkirina xebatên siyasî-civakî erkên aktîf girtine ser xwe.

Di dema sînevîzyonê de wêneyên jiyana têkoşîna Yaman û dîmenên xebatên wî yên serdemên cuda hatin parvekirin. Beşdaran di dema nîşandana sînevîzyonê de kêliyên bi hestiyar jiyan. Piştî bernameyê lokma û xwarin hatin belavkirin.

Bername bi daxuyaniya xwedîderketina li bîranîna Ahmet Yaman û berdewamkirina têkoşîna wî bi dawî bû.

LI ZURIHÊ JI BO DAYIKA ŞEHÎD BERFÊ SAYAN SERSAXÎ

Ji bo dayika şehîd Berfê Sayan a ku ji ber nexweşiya pençeşêrê di 16'ê Sibatê de koça dawî kiribû û li Sêrtê hatibû veşartin, li bajarê Zurih ê Swîsreyê sersaxî hat danîn. Gelek Kurdistanî serdana sersaxiya ku li Navenda Civaka Demokratîk a Kurd a Zurihê hatibû danîn kirin û sersaxî ji malbatê re xwestin.