Ji ber weşanên manîpulatîf ên derbarê jinên Kurd ên li Rojava de, li ber avahiya kovara Der Spiegelê çalakiyek hat lidarxistin. Çalakger ketin hundirê avahiya Der Spiegelê û dosyayek pêşkêşî rayedaran kirin.
Li bajarê Hamburgê yê Elmanyayê, li ber navenda kovara Der Spiegelê çalakiyeke protestoyî hat kirin. Di çalakiyê de hat diyarkirin ku kovarê derbarê têkoşîna jinên Kurd a li Rojava de nûçeyên manîpulatîf û berovajîkirî weşandine.
Bi banga Meclîsa Gel a Hamburgê û Meclîsa Jinê ya Rojbînê, gelek Kurdistanî beşdarî mîtîngê bûn. Çalakî bi deqeyeke rêzgirtinê ji bo bîranîna Şehîdên Azadiya Kurdistanê dest pê kir.
Di mîtîngê de Hevseroka Meclîsa Gel a Hamburgê Fatma Dogan axivî û bal kişand ser têkoşîna jinan a li Rojava û got ku weşanên Der Spiegelê nayên qebûlkirin.
Li ser navê PYD Hamburgê Newroz Haj Hussein jî axivî û diyar kir ku jinên Kurd li dijî DAÎŞ'ê têkoşiyane, lê ev têkoşîn tê paşguhkirin.
Nûnera YJK-E’yê Hediye Bakrak jî îdia kir ku bi nûçeyên wiha hewl tê dayîn ku rûmeta berxwedana jinên Kurd bê şikandin.
Piştî axaftinan, komek jinên çalakger ketin hundirê navenda Der Spiegelê û dosyayeke ku ji aliyê Akademiya Jineolojî ya Rojava ve hatibû amadekirin û belgeyên binpêkirinên mafên mirovan tê de bûn, dan rayedaran.
Di çalakiyê de pankartên bi nivîsa "Şoreşa Jinê ya Rojava Biparêze" û "Şoreşa Jinê Şoreşa Mirovatiyê ye" hatin vekirin. Beşdaran dirûşmeyên curbecur berz kirin.
Organîzatoran ragihandin ku heta daxwazên wan ên ji bo nûçeyên rast derbarê geşedanên li Bakur û Rojhilatê Sûriyeyê û naskirina statuya Rojava neyên qebûlkirin, wê çalakiyên wan berdewam bikin.
