Çalakiya "Konê Berxwedanê" ya ku deh roj berê ji bo protestokirina êrîşên li ser Rojava li bajarê Draguignan ê Fransayê hatibû vekirin, bi beşdariya Şaredarê Draguignan Richard Strambio bi dawî bû.

Li ser navê Meclisa Gel a Draguignanê Saim Toprak di dawiya xwepêşandanê de axivî û diyar kir ku dorpêçkirin û êrîşên domdar ên li Rojava ji bo gel gefek mezin in. Toprak got, "Em ê bi biryardarî têkoşîna xwe li dijî zihniyeta faşîst a ku êrîşî jin, zarok û extiyaran dike û bajaran dişewitîne bidomînin. Heta ku statuya Rojava bê naskirin û azadiya gelê me bê misogerkirin em ê li kolanan bin.”

Şaredarê Draguignan Richard Strambio ku beşdarî çalakiya dawî bû, axivî û hevgirtina xwe bi gelê Kurd û têkoşîna wan a ji bo azadiyê re anî ziman. Strambio piştgiriya xwe bi gotinên "Ez li kêleka Kurdan im, ez li kêleka Rojava me" anî ziman.

Li ser navê Meclisa Jinan a Draguignanê Heval Zozan bi Fransizî axivî, baweriya xwe bi berxwedana jinan û têkoşîna azadiya Rojava dubare kir û got, "Em silav û rêzên xwe ji hemû hevalên xwe re dişînin."

Endamên çapemeniya herêmî,  dostên Fransî-Kurd û komên hevgirtinê yên li herêmê beşdarî çalakiya dawî bûn.

Di daxuyaniyekê de ku ji hêla Meclisa Gel a Draguignanê ve bi sernavê “Em çalakiya Konê Berxwedanê bi rûmetî bi dawî dikin” hat weşandin de wiha hat gotin: “Her qîrînek ku bi navê azadiya Rojava radibe, zincîrên zilm û dagirkeriyê yek bi yek dişkîne. Ev berxwedan wê di her dil û kolanê de bidome. Têkoşîna me wê bidome."

Meclisa Gel a Draguignan, Meclisa Jinan, Tevgera Ciwanan û Malbatên Şehîdan soza xwe ya berdewamkirina çalakiyên piştgiriyê ji bo Rojava û dilsoziya xwe ya ji bo têkoşîna aştiya mayînde dubare kirin.