Nûnerên Mezzaluna Rossa Kurdistan Italia ETS a ku rêxistineke alîkariya mirovî û civaka sivîl a Îtalyayê ye, bi Cîgira Serokê Herêma Toscanayê Mia Diop re civiyan. Serokê Mezzaluna Rossa Kurdistan Italia Alîcan Yildiz û endamê civaka Kurd a li Toscanayê Erdal Karabey jî beşdarî civînê bûn.

Di civînê de du raporên girîng “Li Bakur û Rojhilatê Sûriyeyê Sûcên Şer” a ku ji hêla Akademiya Jineolojiyê ve hatî amadekirin û “Nifûsa gelê Kurd a di Bin Êrîşê de - Rojava / Bakurê Sûriyeyê - Çileya 2026" a ku ji hêla Heyva Sor a Kurd ve hatî amadekirin, hatin pêşkêş kirin.

Raporên ku êrîşên li ser taxên Kurdan ên li Helebê, dorpêçkirina Kobanê û bandorên mirovî û civakî-medîkal li ser nifûsa sivîl li Bakur û Rojhilatê Sûriyeyê hatine belgekirin, destnîşan kirin ku ji destpêka salê ve dibistan girtî ne, bi sed hezaran koçber di avahiyên dibistanan de dimînin û mafê zarokan ê perwerdehiyê bi awayekî cîdî asteng dikin.

Di civînê de bang li saziyên herêmî hat kirin ku zexta siyasî bikin da ku tavilê korîdorên mirovî vekin û gihîştina lênihêrîna tibbî, dermanên bingehîn, xwarin û pêdiviyên ji bo sivîl misoger bikin. Her wiha gefa çekdarên DAÎŞ’ê û malbatên wan ên ku di êrîşên dawî de hatin berdan hat nîqaşkirin; ev rewş ji bo aramiya herêmî û ewlehiya navneteweyî wekî xetereyek cidî hat destnîşankirin.