Li Yewnanistanê, bi boneya 24’emîn salvegera Komploya Navneteweyî ya li dijî Rêberê Gelê Kurd Abdullah Ocalan, meşa dirêj a sê rojan hate organîze kirin. Meş bi pêşengiya Tevgera Ciwanên Şoreşger Navenda Çanda Kurd a Atînayê û Tevgera Jinên Kurd a Ewropayê ve hat lidarxistin.

Starta Meşa Dirêj ku her sal ji bo azadiya fîzîkî ya Rêberê Gelê Kurd Abdullah Ocalan tê lidarxistin, îsal serê sibehê saet di 10:00’an de li kampa Lavrîo ya li paytext Atînayê dest pê kir.

Meş bi dirûşmeya “Ji Rêber Ocalan re azadî, ji Kurdistanê re statu” hat lidarxistin. 50 ciwanên ji her çar parçeyên Kurdistanê tev li meşê bûn.

Di meşê de posterên Abdullah Ocalan û alên PKK’ê hatin hilgirtin. Ciwanan gelek caran dirûşmeyên bi zimanê Yewnanî, Kurdî û Tirkî berzkirin. Kurdên li Lavrîoyê û şeniyên Lavrîoyê jî heta derketina bajêr piştgirî dan çalakiyê.  

Girse wê di 15’ê Sibatê de li navenda bajarê Atînayê bicive û di saet 17:00’an de ber bi Sefaretxaneya Tirk ve meşekî girseyî li dar bixin.