Namzedê Serokkomariyê yê Fransayê Jean-Lûc Melenchon, li ser hesabê xwe yê medyaya dijîtal komploya li ser Rêberê Gelê Kurd Abdullah Ocalan şermezar kir. Melenchon ji bo aştiyê banga azadiya Ocalan kir.
Di hilbijartinên Serokkomariyê yên ku wê di meha Nîsanê de li Fransayê bên lidarxistin de, namzetê Serokkomariyê yê herî bibandor ê eniya çep Jean-Lûc Melenchon komploya navneteweyî ya 15'ê Sibata 1999'an a li dijî Rêberê Gelê Kurd Abdullah Ocalan şermezar kir. Jean-Lûc Melenchon ku bi wesîleya rojê fikrên xwe li ser hesabê xwe yê fermî yê Twîtterê parve kir wiha got: "Li Tirkiyeyê 23 sal in Ocalan di girtîgehê de ye. Hema bêje bi qasî Mandela. Ev ne dadperwerane ye. Pêwîst e Ji bo aştiyê Ocalan were azadkirin."
Jean-Lûc Melenchon ku di nav berendamên çepgir de xwedî avantaj e, li gorî anketên dawî yên li seranserê Fransayê hatine kirin, rêjeya dengên wî ji sedî 11 ye.
