Li bajarê Toulouse yê Fransayê, ji aliyê sendîkaya anarşo-sendîkalîst CNT 31 (Industries & Services) ve civîneke vekirî ji bo gel hate lidarxistin, rewşa heyî ya Bakur û Rojhilatê Sûriyê û êrîşên meha Çile ya 2026’an hate nirxandin.

Di çalakiya ku li lokalê Au Chat Noir pêk hat de, li gorî bangewaziya kampanyaya navnetewî "Rise Up 4 Rojava" peyamên enternasyonalîst ên piştgiriyê hatin bilindkirin.

Aktîvîstên ciwan ên pêşkêşiyê kirin, bal kişandin ser pêvajoya perçekirina Kurdistanê di çar perçeyan de bi peymanên Sykes-Picot û Lozanê, û girîngiya stratejîk a Rojava ya îro. Axaftvanan bal kişandin ser wê yekê ku paradîgmaya konfederalizma demokratîk, ekolojî û azadiya jinê ya Rêber Apo li herêmê jiyanê digire û têkoşîna hevpar a Kurd, Ereb, Suryan û gelên din ên herêmê li dijî DAÎŞ’ê bingeha civakeke pireng û demokratîk li Rojhilata Navîn daniye.

Mijara sereke ya civînê êrîşên leşkerî yên zêde yên hikûmeta demkî ya Sûriyê ya bi Ahmed el-Şara li dijî Rojava bû. Di Çileya 2026’an de pêvajoya dorpêçkirina Kobanê, Hesekê û Qamişlo hate rexnekirin, hate destnîşankirin ku hêzên cîhanî û Tirkiye ji bo xurtkirina hegemonyaya xwe li herêmê HTŞ û hwd. wek amûr bi kar tînin.

Bi taybetî lihevhatina di navbera Hêzên Sûriya Demokratîk (SDG) û hikûmeta demkî ya di 29-30 Çile 2026’an de, mijara herî zêde hate nîqaşkirin bû. Her çend xalên wek mafên çandî û naskirina fermî ya Kurdî gavên erênî bên dîtin jî, axaftvanan bal kişandin ser xetereyên wek mayîna mîsogeriyên xweseriyê tenê li ser kaxizê, lawazbûna destkeftiyên şoreşgerî bi entegrasyona avahiyên leşkerî re û berdewamiya bandora Tirkiyê li herêmê, û gotin ku ev lihevhatin li ser bingeheke pir lawaz e.

Endamên CNT 31 û Rise Up 4 Rojava gotin ku riya parastina berhevkirina femînîst û ekolojîst a Şoreşa Rojava tenê ji rêya seferberiyeke xurt a navnetewî derbas dibe. Di dawiya nîqaşan de bangewaziyeke çalakiyê li hemû hêzên antî-otorîter, femînîstan û kedkaran hate kirin.

Hate gotin ku beşdariya meşa girseyî ya piştgiriya Rojava ya ku roja Înê li kolanên Toulouse pêk tê bibin.

Çalakî bi dirûşmeya "Rojava ne tenê ye" bi dawî bû û soz hate dayîn ku piştgirî ne tenê di salonên civînê de, bi boykot û çalakiyên kolanan li her qadê were mezinkirin.