Di 15’ê Gulanê de li bajarê Toronto ya Kanadayê, ji bo pîrozkirina Cejna Zimanê Kurdî çalakiyek çandî hate lidarxistin. Ji dengbêjiyê, heta pêşkêşkirinên akademîk, xwendina helbestan û pêşkêşkirina sinevizyon gelek çalakî pêk hatin. Di axaftinan de behsa berxwedana dîrokî ya zimanê Kurdî û girîngiya têkoşînê hat kirin.

Bername bi deqeyek rêzgirtin ji bo bîranîna şehîdên têkoşîna azadiya Kurdistanê dest pê kir, piştre sinevizyon hate temaşekirin.

Hevserokên Navenda Civaka Demokratîk a Kurd a Kanadayê di çalakiyê de gotin, "Zimanê Kurdî nasnameya gelekî ye. Xwedî li ziman derketin tê wateya xwedî li hebûna xwe derketine. Divê zimanê Kurdî statuyek qanûnî bi dest bixe û di hemû qadên jiyanê de bi azadî were bikar anîn."

Mamoste Serhad, diyar kir ku zimanê Kurdî beşek bingehîn a hebûna gel e û got, "Ger zimanê Kurdî hebe, em jî hene. Bi salan hewl dan zimanê me tune bikin, lê kevneşopiya dengbêjiyê zimanê Kurdî zindî hişt. Em ê bi axaftin û nivîsandina wê vî zimanî biparêzin."

Mezûna Beşa Lêkolînên Kurdî li Zanîngeha Mardîn Artûkluyê Roza Sierra, jî lêkolînek pêşkêş kir û pêşketina dîrokî ya zimanê Kurdî, polîtîkayên înkarkirinê û lêkolînên akademîk nirxand.

Di çarçoveya bernameyê de, Roza Sierra performansek ji muzîka dengbêjî û erbane pêşkêş kir.

Çalakî bi gerandina govendên gelêrî yên Kurdî bi dawî bû.