Di salvegera 27’emîn a komploya navneteweyî ya 15’ê Sibata 1999’an a li hemberî Rêber Apo pêk hat, wê ji hêla Centre For Kurdish Affairs (Navenda Lêkolînên Kurd) ve li Kamaraya Lordan a Parlamentoya Brîtanyayê panel bê lidarxistin.

Panela ku wê êvara 12’ê Sibatê bi beşdariya siyasetmedar, sendîkavan û akademîsyenan wê panela bi sernavê “Di Rojhilata Navîn a diguhere de Kurd, hevsengiyên hêzê, rîsk û derfet” bê lidarxistin.

Panela ku ji hêla Parlamenterê Partiya Karker Bambos Charalambus ve tê lidarxistin, wê endamê Şandeya Îmraliyê û parlamenterê DEM Partiyê Cengiz Çiçek, endamê Kamaraya Lordan Maurice Glasman, lêkolîner û nivîskara femînîst Rahila Cupta, pisporê têkiliyên navneteweyî Prof. Vassilis Fouskas û berdevkê Têkiliyên Derve yê PYD’ê Salih Muslim beşdar bibin.

Di panelê de wê li ser aliyên siyasî, civakî û mafên mirovan ên pirsgirêka Kurd, bi taybetî pêvajoyên aştiyê, beşdariya demokratîk û rola civaka sivîl rawestin.

Tê payîn ku mijarên wekî siyaseta derve ya Tirkiyeyê, destwerdana herêmî û pirsgirêka Kibrisê, hevgirtina civakî û avakirina aştiyê û aştiya li Rojava û Rojhilata Navîn jî bên nîqaşkirin.

Çalakvanê Centre For Kurdish Affairs Seîd Pirsûs bal kişand ser girîngiya çalakiyê û bi bîr xist ku salvegera komploya navneteweyî 15’ê Sibatê ya li hemberî Rêber Apo pêk hat, xalek girîng a werçerxê ya dîroka gelê Kurd e.

Pirsûs diyar kir ku wê nûnerên tevgera Kurd, akademîsyen, parlamenter û civaka sivîl bîne cem hev û anî ziman ku wê li ser bandora kûr a komployê, berxwedana demokratîk û rêya çareseriyên wê nîqaşên girîng bên kirin.