Li Kanadayê îsal şahiyên “Newroza Azadî û Yekîtiya Demokratîk” bi tevlîbûnên herî girseyî yên dîrokê hatin lidarxistin. Di serî de Toronto bi hezaran Kurdistaniyên ji Vancouver, Montreal û bajarên derdor hatine, li qadên Newrozê banga azadî, yekîtî û çareseriya demokratîk kirin.

Newroza li Torontoyê, weke şahiya Newrozê ya herî mezin a li Kanadayê bû. Ciwanan bi cil û bergên gerîla li cadeyên Torontoyê konvoy çêkirin û ketin qada Newrozê. Jinan bi cil û bergên neteweyî reng dan qadê. Dost jî tevlî şahiyê bûn. Li qada Newrozê wêneyên Rêber Apo, Mazlum Dogan, Sema Yuce, Rehşan Demîrel û şehîdên Newrozê hatin daliqandin.

Şahî ji bo bîranîna şehîdên têkoşîna azadiya Kurdistanê bi deqeyek rêzgirtinê destpê kir. Piştre sirûda Ey Reqîb û ya Kanadayê hate xwendin. Hunermend Denîz Deman, Hocan Canê, Mervan Tan, Evîn Şah û Osman Mirwais derketin ser dikê.

Di şahiyê de bê navber dirûşmeyên “Bijî Serok Apo”, “Yek e, yek e, Kurdistan yek e”, “Jin jiyan azadî”, “Bê Serok jiyan nabe”, “Bijî YPG” û “Bijî gerîla” hatin berzkirin.

Peyama Rêber Apo ya ji Îmraliyê hatî şandin, hate xwendin. Gel bi dirûşmeya “Bijî Serok Apo” peyama pêşwazî kir.

Hevserokên Navenda Civaka Kurd a Kanadayê axivîn û gotin, Newroz sembola berxwedan, azadî û yekîtiyê ye.

Hevserokê KONGRA GEL Remzî Kartal bi dîmen tevlî şahiyê bû û Newroza hemû gelê Kurd pîroz kir.

Ji Parlamentoya Kanadayê gelek parlamenter û nûnerên partiyan tevlî Newrozê bûn û gelê Kurd silav kirin.

Di şahiyê de govend hate gerandin û heya derengî şev dewam kir.