Li hember êrîşên li ser modela rêveberiya xweser a demokratîk a li Bakur û Rojhilatê Sûriyê, li eyaleta Bremen a Almanyayê mîtîngeke girseyî hate lidarxistin. Bi sedan Kurdistanî û komên piştgiriyê li ber Parlamentoya Eyaleta Bremenê civiyan û biryardariya xwe ya parastina destkeftiyên Rojava nîşan dan.

Di axaftinên li mîtîngê de hate bibîrxistin ku pêvajoyên agirbestê yên li herêmê êrîşên li qadê rawestandine. Hate gotin ku binpêkirinên çeteyên cîhadî bûne parçeyeke jiyana rojane û heta siyasetên dewleta Tirk ên ku têkoşîna azadiya gelê Kurd dikin hedef bidomin, aştiya mayînde ne pêkan e. Di axaftinan de bang hate kirin ku “Gelê me divê ne li ser manevrayên dîplomatîk ên rojane, li ser metirsiyên rast ên li qadê bisekine û xebatên parastina Rojava li her qadê mezin bike.”

Yek ji mijarên sereke yên mîtîngê rewşa deverên Kurd ên dagirkirî bû. Axaftvanan bal kişandin ser Efrîn û Serêkaniyê û deverên din ên dagirkirî û gotin ku divê ev herêm di bin mîsogeriya destûrî de bin. Ji Almanyayê û dewletên rojavayî re hate gotin: “Heta ev mîsogerî pêk neyê em ê çalakiyên xwe bidomînin. Malbatên me yên li Rojava hê jî di bin metirsiya êrîşan de dijîn. Rakirina vê fikarê tenê bi naskirina fermî ya statûyê pêkan e.”

Di axaftinan de hate destnîşankirin ku bingeha destkeftiyên Rojava felsefeya civaka demokratîk a ku Rêber Apo pêş xistiye ye; mezinkirina van destkeftiyan û xwedîderketina li mîrateya kesên ku di têkoşîna azadiyê de jiyana xwe ji dest dane, peywireke rûmetdar a gel e. Mîtîng bi xwendina daxuyaniyan û dirûşmeyên silavkirina berxwedana Rojava bi dawî bû.