Li bajarê Baselê yê Siwîsreyê çalakiya nobetê ya Yekîtiya Hêza Demokratîk a Ewropayê (ADGB) di roja duyemîn de berdewam dike. Girseya îro li ber Claraplatzê hatin ba hev, pankarta “Bila girtiyên siyasî serbest werin berdan“ û wêneyên Garîbe Gezer, Halîl Guneş, Abdulrezzak Sûyûr, Vedat Cem Ekrkmen, Îlyas Demîr ên li girtîgehê de hatin qetilkirin û wêneyê girtiya nexweş siyasetmedar Aysel Tûglûk rakirin.

ADGB’ê di çalakiyê de bal kişand li ser rewşa girtiyên nexweş û got: “Girtigehên Tirkiyeyê veguherîne çala mirinê. Divê di serî de siyasetmedara Kurd Aysel Tûglûk û hemû girtiyên nexweş serbest werin berdan.

Nûnera Komeleya Mafê Mirovan (ÎHD) ya Siwîsrê Mîne Nazarî ji ANF’ê re axivî û bal kişand li ser rapora ÎHD’ê ya girtîgehan.

‘BILA GIRTIYÊN NEXWEŞ SERBEST WERIN BERDAN‘

Nazarî anî ziman ku binpêkirinên mafan li girtîgehên Tirkiyeyê di asta herî jor de ye û got: “Li girtîgehên Tirkiyeyê 600 girtiyên nexweşiya giran û zêdetirî hezaran girtiyên nexweş tên girtin. Li rexmê rapora bijîşk ku nikarin di girtîgehê de bimînin jî girtiyên nexweş nayên serbest berdan û mafê wan yê tedawiyê tê astengkirin. Li dijî van pêkanînên dijmirovahiyê em li her cihê û timî bibin dengê girtiyan.“

Di çalakiyê de belavokên bi zimanê Elmanî hatin belavkirin.