8’ê Adarê Roja Jinên Cîhanê li Amsterdamê bi tevlîbûna bi hezaran bi meşekî hate pîrozkirin. Jinan di çalakiyê de daxwazên xwe yên wekhevî, azadî û piştevaniyê anîn ser ziman û peyamên piştevaniyê bi têkoşînên jinên li herêmên cuda ên cîhanê hat dayîn.
Li paytexta Hollanda Amsterdamê 8’ê Adarê Roja Jinên Cîhanê bi meşekî girseyî bi coş hate pîrozkirin. Çalakî bi banga hevpar a Yekîtiya Jinên Kurd a Hollandayê (YJK-H) û Femînîst Marchê hate lidarxistin û peyamên azadî û piştevaniyê hatin dayîn.
Di çarçoveya çalakiyê de girseyê li Qada Damê li hev civiya. Piştî axaftinên li vir, bi hezaran kes bi pankart, dowîz û dirûşmeyan ber bi Museumpleinê dest bi meşê kirin.
Di tevahiya meşê de îşaret bi girîngiya têkoşîna jinan hat kirin û peyamên piştevaniyê ji bo jinên ku li herêmên cuda ên cîhanê li ber xwe didin, hat parvekirin. Bi taybet têkoşîna azadiyê ya jinan a li Rojava û Rojhilat hate silavkirin.
Di pankart û dowîzên hatin hilgirtin de peyamên li dijî qetilkirinên jinan, polîtîkayên şer, newekheviya zayendî û cihêkariyê hate dayîn. Beşdaran destnîşankirin ku têkoşîna birêxistinkirî ya jinan ne tenê ji bo jinan, ji bo azadî û civakekî adilane jî xwedî girîngiyekî jiyanî ye.
Meşa ku ji Qada Damê heta Museumpleinê çû, tevî dirûşme û axaftinan dewam kir. Di tevahiya çalakiyê de hêza piştevaniya jin û têkoşîna hevpar carekî din hate destnîşankirin. Çalakî piştî axaftin û peyamên piştevaniyê bi dawî bû.
