Nûnerên partiyên siyasî, rêxistinên sivîl û demokratîk û saziyên olî yên ji her çar aliyên Kurdistanê li Navenda Civaka Kurd a Dortmundê civiyan. Saziyên Kurdistanî, gotin ku Newroza 2026’an dê bibe sembola yekîtiya neteweyî ya gelê Kurd.

Di civîna ku li ser banga KCKD-E û KON-MED’ê hat lidarxistin de, Partiya Yekîtiya Demokratîk (PYD), partiyên ji Rojhilat, Rojava û Başûr û saziyên olî yên Kurdistanî amade bûn. Di nîqaşan de hate gotin ku yekane bersiva li hember êrîşên li ser destketiyên gelê Kurd, "Yekîtiya Neteweyî" ye.

Her wiha, hate gotin ku Newroza 2026’an, ku dê li Frankfurtê were pîrozkirin, dê bibe qadeke têkoşînê ya hevpar ku hemû reng û îradeyên siyasî yên Kurdistanê bîne cem hev.

KURMANCÎ, KIRMANCKÎ, SORANÎ: YEK DIL Û YEK DENG

Di civînê de, rêxistinan bal kişandin ser dewlemendiya çandî û ziman a pîrozbahiyên Cejna Newrozê. Hate diyarkirin ku pîrozbahiya navendî ya li Frankfurtê dê zaravayên Kurmancî, Kirmanckî û Soranî û her wiha melodiyên herêmî yên Kurdî û motîfên folklorîk nîşan bide.

Rêxistinan, dan zanîn ku pêvajoya ku gelê Kurd tê re derbas dibe, pêwîst dike ku li ser nasnameyek neteweyî ya hevpar xalên hevpar werin dîtin û di heman demê de cudahî werin parastin. Kurdistanî û dostên wan ên li Ewropayê ji bo pîrozbahiya Newrozê ya navendî li Frankfurtê hatin vexwendin û rengên xwe yên neteweyî nîşan dan.