Sakîne Cansiz, ango Sara damezirînera Partiya Karkerên Kurdistan (PKK), Fîdan Dogan ango Rojbîn, Nûnera KNK’ê ya Parîsê û Leyla Şaylemez ango Ronahî, Endama Tevgera Ciwanan a Ewropa , li Parîsê hatin qetilkirin.  Di 9'emîn salvegera Komkujiya Parîsê de Kurd û dostên xwe li qadan in û wê li gelek welatên Ewropa meşên mezin werin organîzekirin.

Li bajarê Marsîlya û roja înê li Montpellier, Drauignan û Marignane meşên mezin wê werin lidarxistin.

Di pêşengtiya Navenda Meclîsa Jinan a Arîn Mîrkan wê roja înê di saet 13.00'an li qada Canabiere dest pê bike û heta qada Vieux Portê bidome. 

Endama Komîteya Amadekar a Meşê Gulê Varto anî ziman ku rexmê 9 sal li ser komkujiyê re derbas bûn jî kujer û hevkarên wan nehatine diyarkirin û got: "Di çarçoveya amadekariyan de kolan bi kolan, tax bi tax em geriyane û me belavok û afîş hilawistine. Di heman demê de li Navenda Civaka Demokratîk a Kurd qûncika ji bo bîranîna şehîdan me amade kir."

Varto, bang li her kesê ku li başûrê Fransa dijî tevlî meşê bibin kir û got: "Heta kujer werin diyarkirin em ê timî li qadan bin. Em ê li ser rêya Sara, Rojbîn û Ronahiyê bimeşin."