Bi boneya 23’emîn salvegera komploya navneteweyî ya li dijî Rêberê Gelê Kurd Abdullah Ocalan, li paytexta Awûstûrya Viyanayê bi organîzasyona Navenda Civaka Kurd a Demokratîk meş û piştre mîtîngek hate lidarxistin.

Kurdistanî û dostên wan di saet 15.00’an de li Christian-Baroda-Platzê li hev civiyan û beriya meşê ji bo bîranîna şehîdên Kurdistanê û şoreşê rêz hate girtin.

Piştre nûnerên Eniya Yekbûyî ya Demokratîk a Gelan (HDBH), Yekîtiya Komîntern û Civaka Azad a Awûstûryayê bi axaftinên komploya navneteweyî şermezar kirin.

Piştî meşê axaftin hatin kirin û hate gotin ku bêyî Rêberê Gelê Kurd Abdullah Ocalan pirsgirêka Kurd çareser nabe. Di berdewama axaftinan de ev tişt hatin gotin:“Rêberê Gelê Kurd Abdullah Ocalan 23 sal in li dijî tecrîdek mutlak li ber xwe dide. Heta ku tecrîd bidome wê tu çareserî neyê Tirkiyeyê û welat aram nabe. Heta ku Rêber Apo azad bibe em ê li qadan bin.“

Mîtîng û meşa ku bi qasî du saetan dewam kir, bi dirûşmeyan bi dawî bû.