Çalakiya ku Kurdistaniyan li pêşiya avahiya Neteweyên Yekbûyî ya li bajarê Cenevreyê ya Swîsreyê dabûn destpêkirin, didome. Di çalakiyê de alên Rêberê Gelê Kurd Abdullah Ocalan, PKK û KCK’ê hatin hildan. Di çalakiyê de tim dirûşmeyên “Bijî Serok Apo“ û “Bê Serok jiyan nabe“ hatin berzkirin.

Di çalakiya vê heftiyê de 7 şervanên YBŞ'ê, 2 gerîlayên HPG'ê, endama TAJÊ Nazê Naîf û Rojnameger Nûjiyan Erhan ên di 3'ê Adara 2017'an de di êrîşa PDK'ê ya li Xanesorê de şehîd bibûn, hatin bîranîn.

Nûnera Kongra Star a Helebê Dayîka Şoreş, bi rêya telefonê beşdarî çalakiyê bû û bal kişand li ser girîngiya çalakiyê û çalakger silav kir.

‘HETA RÊBER APO AZAD BIBE EM Ê ÇALAKIYÊN XWE BIDOMÎNIN‘

Piştî axaftina Dayîka Şoreş, Hevserokê Navenda Civaka Demokratîk a Kurd a Cenevreyê Salih Saglam bi rêzgirtina navê şehîdên Xanesorê yek bi yek dest bi axaftina xwe kir û ev tişt got:“Zêdetirî salek e em ji bo daxwazên mafdar û rewa yên gelê Kurd li ber avahiya Neteweyên Yekbûyî û saziyên din ên navneteweyî çalakiya rûniştinê li dar dixin. Divê ev dewlet û sazî baş zanibin ku heta azadiya Rêberê me û gelê Kurd pêk were em ê çalakiya xwe bi biryardarî bidomînin û daxwazên xwe ji hemû cîhanê re biqîrin.“

Çalakî bi dirûşmeyan bi dawî bû.