Bi sedan xwendekarên Zanîngeha Herranê, bi meşekê 15'ê Gulanê Cejna Zimanê Kurdî pîroz kirin.

Bi pêşengiya Komeleya Xwendekarên Zanîngeha Herranê (HODER), bi sedan xwendekar li Kampusa Osmanbey li hev kombûn û bi meşekê cejna zimanê Kurdî pîroz kirin. Xwendekaran pankarta bi nivîsa "Ciwan hêzên parastina ziman in" vekirin û dowîzên bi nivîsa "Bila zimanê Kurdî bibe zimanê fermî", "Bi Kurdî bifikire, bi Kurdî biaxife" û "Dar li ser koka xwe, mîrov li ser zimanê xwe şîn dibe" hildan. Xwendekaran di çalakiyê de dirûşmên "Bê ziman jiyan nabe", "Be serok jiyan nabe" û "Bijî serok Apo" qêriyan û govend gerandin. Dûre bi awayekî temsîlkar dersa zimanê Kurdî hat dayîn û piştre ciwan ber bi Fakulteya Fen Wêje ve meşiyan.

Xwendekaran li ber fakulteyê deqeyek rêz girtin û li vê derê li ser navê xwendekaran Firat Dogan daxuyaniyek da. Dogan diyar kir ku, li dijî êrişên li hemberî gel û nirxên wan, ewê di rewşa parastina rewa de bin. Dogan destnîşan kir, ku ziman hebûn û xwe-nasîna gelekî ye û got, "Parastina ziman, mafekî rewa ye. Em weke xwendekar, xwe ji vê rewşê berpirsyar dibînin. Mejî û pêşengê civakê ciwan in. Heta ku dewleta Tirk zimanê me nas bike û bike zimanê perwerdeyê, emê têkoşîna xwe dewam bikin. Ciwan hêza parastina ziman e."