Şandeya Koma Civakên Kurdistanê (KCK) ya bi serokatiya Endamê Konseya Rêveber a KCK’ê Sabrî Ok li Silêmaniyê hevdîtinek bi rayedarên Yekitiya Nîştîmanî Kurdistanê (YNK) re hevdîtin pêk anî. Di hevdîtinê de rewşa giştî ya Kurdan, konferansa neteweyî ya Kuran û pêvajoya li Bakûrê Kurdisanê  hatin gotûbêjkirin. Dîmenên hevdîtinê di çapemeniya Başûrê Kurditanê de hate weşandin.

Duh şandeya KCK’ê ya ji Endamê Konseya Rêveber Sabrî Ok û Berpirsê Peywendiyên Derve yên KCK’ê Ahmet Denîz pêk dihat, li Silêmaniyê ji aliyê Cîgirê Sekreterê Giştî yê YNK’êDr. Berhem Ehmed Salih û rayedarên din ên YNK'ê ve hate pêşwazîkirin. Di hevdîtinê de ji YNK’ê tevî Berhem Salih endamên Polîtbûroya YNK’ê Qadir Heme Can, Çeto Hiwêzî û Mehmûd Hajî Salih û Endamê Kogreya Neteweyî ya Kurdistanê Mihemed Penciwînî jî amade bûn. Lê cara yekem e ku hevdîtinek wiha di çapemeniya Başûr de cih digire.

Berpirsê Peywendiyên Derve yê KCK’ê Ahmet Denîz ku derbarê hevdîtinê de agahî da ANF’ê diyar kir ku ew di vê pêvajoya girîng a dîrokî de hevdîtinê bi hemû partî û rêxistinên Kurd re hevdîtin pêk tînin û got ku hevdîtinên wan dê bidomin.

Denîz got; “Em di pêvajoyeke girîng de ne. Bi taybet bûyerên li Rojhilata Navîn diqewimin pir girîng in û Kurd di navenda van geşedanan de ne.” Denîz derbarê hevdîtinê de diyar kirku hevdîtineke asayî ya du aliyên Kurd bû û got ku di hevdîtinê de pêşketinên li herêmê, bi taybet ên Kurdan eleqeder dikin, konferansa neteweyî ya Kurdan û pêvajoya çareseriyê ya li Bakûrê Kurdistanê hatin gotûbêjkirin.

Denîz da zanîn ku hevdîtinên wan ên bi vî rengî yên li gel hemû partî û rêxistinên Kurdistanî Kurd çêdibin û got ku divê pêvajoyê de Kurd di navenda geşedanên girîng ên li Rojhilata Navîn diqewimin de cih digirin û got ku ew helwesta hevpar a Kurdan a li hemberî van geşedan û bûyeran gotûbêj dikin.

Denîz derbarê naveroka hevdîtinê de jî diyar kir ku hevdîtin bi awayeke erênî derbas bû û got: “Di hevdîtinê de helwesta hevpar a Kurdan a li hemberî bûyerên li herêmê, divê Kurd çawa nêzîk bibin, konferansa neteweyî ya Kurdan, girîngiya piştevaniya Kurdan bi hev re û pêvajoya li Bakûrê Kurdistanê hatin gotûbêjkirin.”

Hêjayê gotinê ye ku ev yekem car e ku hevdîtineke wiha bi rayedarên KCK’ê re di çapemeniya Başûrê Kurdistanê de tê weşandin. Denîz da zanîn ku rayedarên YNK’ê xwestine ku dîwarên di navbera partiyên Kurdan de bên rakirin û hatin û çûna her du aliyan normal bibe û got ku wan jî vê yekê bi erênî pêşwazî kiriye.

Her wiha, Denîz da zanîn ku dê hevdîtinên wan bi partî û rêxistinên Kurd re berdewam bikin.