Komîsyona Aqilmendan ya Herêma “Rojhilata Anatoliyê” ziyareta xwe ya herêmê berdewam dikin. Heyetê li Qersê bi saziyên sivîl ên civakî û gel re civîn pêk anîn. Di civînan de rapora ku hat xwestin Rêberê Gelê Kurd Abdullah Ocalan serbest bê berdan pêşkêşî heyetê hat kirin

Komîsyona Aqilmendan a Herêma “Rojhilata Anatolyayê” gera xwe ya li herêmê berdewam dike. Komîsyonê piştî li Îdirê civin pêk anî derbasî Qersê bû. Heyetê despêkê li navçeya Dîogara Qersê welatî û esnaf silav kirin û derbasî Bajaroka Pazarcixê bû. Heyet li Bazarcixê bi def û zurneyan hat pêşwazîkirin.
Gelê Bazarcixê ji heyetê re got: "Bila her kes zanibe gelê Kurd ji aştiyê re amade ye. Ji bo aştiyê amade ye her tiştî bike. Vê yekê ji dewletê, hikûmetê û her kesî re bêjin." Heyet piştre derbazî Qersê bû. Heyetê li Salona Konferansê ya Otela Sim-Erê bi saziyên sivîl ên civakî re civîn pêk anî. Di civînê de Serokê Giştî yê Hak-Îş'ê Mahmut Arslan diyar kir ku, Rêberê Gelê Kurd Abdullah Ocalan û Erdogan destûr nedan ku welat perçe bibe û wiha got: "Pêvajoya aştiyê pir zehmet û zore. Demê û sebrê dixwaze. Pirsên 'ma em perçe dibin' ji me tê pirsîn. Raste li Wan û Colemêrgê qetinêk hebû. Lê birêz Ocalan û Erdogan ev yek asteng kirin. Li şûna perçe bike pêvajo ber bi yekîtî û yekbûnê ve birin. Em bang li kesên dibêjin pirsgirêka Kurd tune dikin û dibêjin dest ji van gotinan berdin. Bila Kurd bi xwe biryara xwe bidin. Destpêkê digotin kurd tune ne, zimanê kurdan tuneye. Lê niha Kurd hene û zimanê wan jî heye. Her kesî ev rastiya qebûl kir. Êdî her kes mafê 70 milyon welatî yê wekhevî û edaletê dixwazin."

Serokê Heyetê Can Paker jî anî ziman ku, gel tu carî perçekirina welat nexwestiye û her tim leşker û burokratan perçekirin xwestiye. Peker anî ziman ku, li Tirkiyeyê gel ne alîgirê perçekirinê ye û wiha got: "Kurdan qet perçekirina Tirkiyeyê nexwestiye. Yên perçekirin xwestine burokrat û leşkerin. Divê berî her tiştî em mejiyê burokrat û leşkeran paqij bikin.

Di civînê de deklerasyona ku Serokê Partiya Gelan a Demokratîk (HDP) a Qersê Ayhan Gezîcî, Serokê Şaxa Genel-Îşê ya Qersê Mesut Ozer, Serokê Tum Bel-Sen'ê yê Qersê Vedat Doganay, Nûnerê BES'e yê Qersê Înan Ercan, Nûnerê ÎHD'ê yê Qersê Onur Gundogdu, Serokê Şaxa Egîtîm Senê Çetin Koçîgît, Serokê Astengdarên Gul û Çavan ê Serhedê Habip Sincar, Nûnerê HDK'ê yê Qersê Ekrem Savci, Nûnerê Orkam-Sen'ê yê Qersê Ekrem Bingol û Komeleya Şoreşgerên 78'an a Qersê Celalettin Îlyan îmze kiribûn pêşkêşî heyetê kirin. Di deklereasyonê de xwest bêyî ku cudahiyê têxin nava ziman, nasname, çand, bawerî, mezhep û zayendê û hemû rastiya civakê qebûl bike û makeqanûna nû ava bikin.

Saziyên sivîl ên civakî daxwazên xwe wiha rêz kirin:

* Divê di pênaseya welatîbûnê de hemû nasname, ziman, çand, bawerî û rengên civakên Tirkiyeyê bên nasîn û parastin.

* Divê mafê gelan ên demokratîk, çand, bên parastin û pêşxistin. Divê makeqanûna demokratîk û azad dike bê avakirin.

* Divê mafê perwerdehiya zimanê zikmakî bê nasîn û hemû astengiyên li pêş ziman bên rakirin. Divê perwerdehiya ziman wekî mafekî bingehîn bê qebûlkirin. Divê hemû xebat û xizmetên bi ziman bên serbestkirin.

* Di vê pêvajoya aştiyê de divê aliyê pêvajoyê birêz Abdullah Ocalan jî di navde hemû siyasî bê şert bên berdan.

* Divê pergala cerdevaniyê bi dawî bibe.

* Divê benda hilbijartinê ya ji sedî 10 bê rakirin.

* Divê rayeya meclîsên şaredariyan û bajaran firehtir bibe.

* Divê êdî perwerdehî ji destê bîrdoziya dewletê derkeve û têkeve xizmeta civakê.

* Divê dersên olî yên bi zorê bên rakirin û her kes azad îbadeta xwe bike.

* Divê wekheviya jin û mêr bê pêşxistin. Divê hemû astengiyên ku di qada civakî, siyasî, aborî û çandî de li pêş jinê dibin asteng bên rakirin.

* Divê wekheviya hatinê bi awayekî adîl bê pêşxistin.

* Divê hesabê darbeya leşkerî ya 12'ê Îlonê bê pirsîn.

* Divê pergala taşeroniyê bi dawî bibe.

* Divê êdî çavkaniyên welat pêşkêşî sermayedaran neyê kirin.

* Divê hemû astengiyên li pêş azadiya ramanê, rêxistinkirinê û demokrasiyê bên rakirin.

* Divê qada azadiya mirovan bê parastin.

* Divê zextên li ser mafê sendîkayî bi dawî bibin.

* Divê berjewendiyên gel li ber çavan bên girtin, parastina ekolojiyê bê kirin û destûr neyê dayîn ku santrolên hidroelektrik, termik û nukleeran bên avakirin.